No.2671/2020-2020

A.H & Vety Department hotute chuan tunlai hian Mizoram ramri dep khaw hrang hrang leh duty te an tlawh kual a, lawmthu sawina neiin, tanpuina an hlan a ni.

AH& Vety Department hotute hi Team hnihah inthenin, Team hnihna Dr. F. Laltanpuia DD (H) leh Dr. C. Neihthangpuii VO (H&D) te leh anmahni tawiawmtu Dr. B.Zonghinga DVO Champhai leh Dr. M.S Dawngliana VO te chuan vawiin khan Champhai district chhunga Zokhawthar, Melbuk, Ruantlang leh Tlangsamte tlawhin, naktuk July Ni 3, 2020 hian Zote, Ngur, Vapar leh Hnahlante an tlawh leh dawn a ni. Team dang Team khatna memberte, Dr. M. Zohmingthangi DD(DI) leh Dr. Esther Lalzoliani VO (DI) te hian Mamit district chhunga Kawrthah, Tuidam, Rengdil, Zamuang, Bungthuam leh Kanhmun bakah, Kolasib District chhunga Bairabi, Vairengte leh Saiphaite nimin July Ni 1 leh vawiin July Ni 2, 2020 hian an tlawh bawk a ni.

A.H & Vety. Departmenta thawktute hian Vawk natna hlauhawm tak, kan ramah a lo lut ve mai ang tih hlauhawm tak ASF (African Swine Fever), kumin March thla maia Assam leh Arunachal Pradesh-a leng Vawk 20000 (Singhnih) chuang zetin an thih phah ngaihvena ramri hrul khuate leh duty-te tlawha fehchhuak an ni a. Khawtlang hruaitute nen inkawmhona neiin, inhrilhhriatna leh zirtirnate a tul angin an pe zel a ni.

Kumin February thla mai khan kan ram thenawm Myanmar-ah pawh he natna hri hi a leng tih puanzar a ni bawk a, ASF (African Swine Fever) hi Vawk leh Sanghal natna tihbaiawm tak, a vei zaa za (100%) in an thihpui theih natna a ni a, a enkawlna tur damdawi a awmlo a, a venna Vaccine a awm rih lo bawk a ni.

Kum 2013,2016 leh 2018 a PRRS Vawk natna lengin Mizoram Vawkte nasa taka suatin, Vawk vulhtute dinhmun nasa takin a nghawng chhia a, ram economy pawh a tichhe hle a ni. Tuna ram thenawm maia leng mek ASF (African Swine Fever) hi PRRS ai chuan a nghawng a nasa zual thei hle tura ngaih a ni a. He hri laka kan ram a him theih nan Vawk, Vawksa leh Vawksa atanga siam eitur reng reng kan rama lut tur kan dan tlat hi kan himna tur awmchhun a nih avangin Sawrkar pawhin a ngai pawimawhin, District tina District Magistrate te - Vawk, Vawksa leh Vawksa atanga siam eitur reng reng lalut lo turin thupek an chhuah reng bawk a ni.

AH&Vety department chuan thupek chhuah tihhlawhtlin anih theihna kawnga dan leh thupek kengkawhtute, ramria duty zawng zawngte theihtawp chhuaha venpui turin a ngen tak meuh meuh a. Heng khua an tlawhte hnenah hian lawmthu sawinan cheng 5,000/- theuh an hlan bawk a ni. Tun thlenga khawvel pumpui buaipui Covid-19 natna laka mipui nawlpui himna leh ASF Vawk natna laka Mizoram himna chhan pawh hi dan leh thupek kengkawhtute leh ramria duty te thawhrimna leh inpekna vang liau liau anih thu tarlangin, AH&Vety department chuan an chungah lawmthu a sawi tak meuh meuh a ni.