No.7983/2020-2021

Lawngtlai, Vau thla ni 31, 2021: Vawiin khan ANM (Auxiliary Nurse Midwife) School, Lawngtlai chuan an School Auditorium-ah 4th batch zirlaite lukhum khumtirna leh khawnvar chhi-a thu tiam lakna hun (Capping and Lamp Lighting Ceremony) an buatsaih.

He hun hi Lawngtlai DRDA Project Director/Additional DC Pi Marilyn Rualzakhumthangi'n hmanpuiin, lawmpuina thu leh zirlai tharte fuihna thu a sawi a. ANM School Lawngtlai chu an result leh sikul inenkawlnaah mit tlung, chhuanawm leh District timawitu nia a hriat thu sawiin, Principal leh thawktute inpeknaah a fak a. Nurse-te pawimawhna leh an rawngbawlna hlutzia tar langin, zirlaite chu thahnem ngai taka an zirlai zir tur te, sikul inrelbawlna zawm thiam a, zirtirtute thu awih tur leh an zir chhuah hunah pawh nurse rawngbawl hna zahawmna humhimtu leh vawng nungtu nih tum tlat turin a chah.

Christian Hospital Lawngtlaia Assistant Nursing Superintendent Pi Lalhlimpuii Hrahsel chuan 4th batch zirlai tharte chu lukhum khumtirin, khawnvar a chhittir a; zirlai tharte chuan thu tiam an sawi rual nghal bawk. Capper & Lamp Lighter Pi Lalhlimpuii Hrahsel chuan lukhum chuan mi dang tanpui tura mawhphurhna a ken tel thu leh a rawng var chuan thianghlimna a entir thu sawiin, khawnvar hal chu mi dang tana eng chhuak tur te, inchhem alh tawn tur te leh thiamna leh mawhphurhna inhlan chhawng tura Florence Nightingale-i khawnvar chhit chhunzawm zelna a nih thu a sawi.

He hun hi ANM School Female Voice te'n zaiin an hawng a. District Hospital Lawngtlaia Staff Nurse Pi MC Lalvarparhi chuan hunserh hmangin, School Principal Pi C. Rothangpuii'n school report tlangpui a sawi a. ANM School 2nd Year zirlaite'n "Nurse Hla" sain, Tutor Pi Baby Zothansiami'n lawm thu a sawi a. Presbyterian Kohhran Lawngtlai Chandmary Bialtu Pastor Rev. Lallungmuana'n zirlai tharte tawngtaisakna hun a hman bakah, malsawm tawngtaiin hun a khar a ni.

He hunah hian ANM School Lawngtlaia zirlaite bakah, zirlai nu leh pa te, health department-a thawktute, sawrkar officer-te, tlawmngai pawl ai awhte leh sawm bik mi eng emaw zat an tel a ni.

ANM School Lawngtlai hi October 2017 khan zirlai 20 awma bul tan niin, 1st batch leh 2nd batch-in an zir chhuak tawh a. A tirah chuan CMO Lawngtlai hnuaiah awmin, kum 2019 October thla atang khan Principal kutah Drawing & Disbursing Officer (DDO) thuneihna pek niin, mahnia inrelbawl hrangin an awm tan a. Tunah hian Principal pakhat (1), Tutor pali (4), Non-teaching staff pariat (8) leh zirlai 39 an awm mek a.  Pawl 12 pass hnua zir theih niin, kum 2 zir tur a ni a. Session hi October-September a ni. Tun tumah hian 1st year zirlai sawmhnih (20)-in thu tiam an la thar a ni.

Attachment

  • Loading attachment...