Mizoram sawrkar chuan Planning Commission of India-in a hun pangngaiah Annual Plan 2009-10 a ruahman fel hman loh vanga Annual Budget 2009-10 pharh hmain sum lo hman lailawkna tur Vote on Account-in tum hnih March, 2009 – ah leh July, 2009 khan thla li chhung ve ve atan a lo pharh tawh a. Budget pharhtu, Pu Lal Thanhawla, Chief Minister, Finance changtu nibawk chuan tuna Budget pangngai (full budget) a pharh theih ta chu lawmawm a tih thu Budget pharhnaa a thusawiah a tarlang a ni.

Planning Commission of India chuan Mizoram Sawrkar Annual Plan atan Rs. 1,250.00 crore a ruahman a, chu chu Department hrang hrangah sem darh a ni a. Hetah hian Sawrkar scheme pawimawh tak NLUP atan Rs 100.00 crore ruahman tel a ni.  Planning Commissiion-in sum a ruahman bakah hian NEC, NLCPR leh CSS leh thildang hnuaia sum hmuh belh te nen Plan hnuaiah sum hman tur zawng zawng chu Rs. 1,476.08 crore a ni a, Non-Plan hnuaiah Gross Expenditure tur Rs. 2,391.33 crore ruahman a ni bawk. Tichuan kum 2009-10 chhunga sum hman tura ruahman zawng zawng (Plan leh Non-Plan belh khawm-Gross Expenditure) Demands for Grants-a tarlan chu Rs. 3,867.41 crore niin, Net Expenditure tur chu Rs. 3,687.39 crore a ni. Budget bu (Annual Financial Statement)-a tarlan dan chuan, Account hrang hranga sum hmuh leh hman tur chhut khawm hnuah 2009-10 Budget bik chu ‘Surplus Budget’ niin, surplus Rs. 13.00 crore awm tura tarlan a ni a, 2008-09 kumtawpa deficit Rs 70.45 crore lo awm tawh vangin, 2009-10 kumtawpa sum indaih lohna (deficit) ni tur erawh chu Rs. 57.45 crore nia tarlan a ni.

Tun tum Budget pharh takah hian chhiah thar lak rawtna a awm lova. Amaherawh chu chhiah lak mekte chu kimchang leh felfai taka lak tum a nih tur thu Chief Minister hian a sawilang.