Aizawl South-III huam chhung sorkar department hrang hranga thawktute kum tin inhmuhkhawmna thin tur chu a vawi khatna atan vawiin khan Aibawk Community Hall-ah neih a ni a, bialtu MLA Parliamentary Secretary Pu K.S.Thanga’n a telpui a ni.

Sorkar hnathawk mi 200 chuang zet telna ah hian thuchah sawiin Parliamentary Secretary chuan Aizawl South-III bial chu kawng engkima bial entawntlak leh hmasawn nih tum tura chahin hemi atan hian a pawimawh hmasa ber ber te chu sorkar hnathawkte an ni, a ti a. Ei leh bar dehchhuah kawngah te, intodelh leh huanthlai siam kawngah te, mipui mimir hmasawnna tura sorkar hmalak kawng tinrengah te, khawtlang nun siam that leh ramngaw humhalh kawngah pawh a hmahruaitu tur te chu sorkar hnathawkte an nih avangin an mimal nun thlenga in uluk leh invawng thianghlim turin a ngen a ni.

A bial chhunga thalaite hmakhua thlira infiamna tih hmasawnna turin Parliamentary Secretary chuan tangkafai lawmman a buatsaih thu a puang a, international leh national level-a medal dawngte tan sum fai lawmman a siam a - International bikah Gold Rs.50,000/-, Silver Rs.30,000/- leh Bronze Rs.20,000/- a ni a, National level-ah chuan Gold Rs.10,000/-, Silver Rs.5000/- leh Bronze Rs.2500/- a ni. National level-a lawmman dawngtu mi 3 - F. Lalruatfela (Judo-Gold Medal), Lalzahawmi (Wrestling-Silver Medal) leh Lalmuanawmi (Karate-Silver Medal) te hnenah vawiin khan Pu K.S.Thanga hian lawmman tangkafai a hlan nghal a ni.

Vawiina inhmuhkhawmna ah hian hemi bial chhunga khawtlang hruaitu mi thahnem tak an tel a, harsatna leh hmalak an nei mek chungchang Parliamentary Secretary hi an sawipui bawk a ni.