3801/2024-2025

Dated Hnahthial, the 15th January, 2025: Economic and Statistics Department, District Research Office (DRO) Hnahthial bultumin ni hnih chhung awh tur - ‘Annual Training of Registrar of Birth and Death’ chu vawiin khan DRO Office, Hnahthialah neih tan a ni a. Training hi Hnahthial District Bawrhsap, Pi Rita Lalnunmawii Pachuau chuan khuallian niin a hawng.

Training hi Pu PC. Vanlalrova, DRO Hnahthial chuan a kaihruai a.  Training hawngtu, khuallian, Pi Rita Lalnunmawii Pachuau chuan Registrar of Birth and Death te hnathawh chu kan ram hnuk khawih thil a ni tih an hriat reng a tul thu sawiin Statistics leh Data dik hi ram hmasawnna a ni a ti a. A chhan pawh Data lakkhawm hmanga ram kaihhruai dan tur duan chhuah a nih thin vang a ni a ti. Kan ram pawhin nasa takin hma kan sawn a, hma kan sawn leh zual theihna tur chuan data leh statistics dik tak kan neih hi a tul a ni a ti a. Khuallian chuan Hnahthial District chu Myanmar ramri a awm a nih avangin Birth & Death Registrar te chu an fimkhur a tul hle a ni tiin ram dang mi birth certificate pe chhuak lo tura theih tawp an chhuah a tul a ni a ti bawk. Khawtlang hruaitute leh NGO te pawh hemi kawngah hian an pawimawh em em a ni tiin data rintlak leh dik neih theihna tura a bul bera awm te an nih avangin tha tak leh rinawm taka an hna thawk tura ngenin, uluk taka training nei turin a chah nghal bawk a ni.  

Report a tarlan a nih danin Economic & Statistics Department, Hnahthial DRO hnuaiah Registrar of Birth and Death sawmthum panga (35) an awm mek a. Mizoram puma Birth & Death Registration, damdawiin behchhana an neih mek, Registrar of Birth and Death (RBD) za sawm paruk (116) te chuan nikum November 11, 2024 atang khan Online Registration kalpuiin nau piang leh thi te hnenah Digitized Certificate an pe chhuak tawh a. Hetiang hian veng/khua tana RBD za sarih sawmruk pariat (768) te pawhin February 1, 2025 atanga Online Registration ti a, Digitized Certificate an pek chhuah tan theih nan Training hi nei an nih thu tarlan a ni bawk.