Vawiin khan Pu P.C. Zoram Sangliana, Art & Culture Minister chuan Tourist Resort, Reiek-ah Tourism Department buatsaih, ni thum awh tur “Anthurium Festival 2013” a hawng.

Pu P.C. Zoram Sangliana chuan Mizoram Tourism Department-in Anthurium pangpar mawi tak hming chawia he Kut hlimawm tak Mizote tana hun hlimawm lai ber, Favang laia an buatsaih thin chu lawmawm a tih thu a sawi a. Mizoten kum khat a Kut chi thum kan hman thin zinga mi nilo mahse, ram dang leh state dang mite hip khawm nan leh, thangtharte tan Kut thar hmel min buatsaihsak hi kan hlimpui hle a ni, a ti a. Anthurium Kut chu hnam rawngkai leh hnam nun zepui “Mizo Culture” pholan nan leh parchhuahpuina atan hman ani chuan Mizo zawng zawng min kai thova,“A zawngchhang thlak hle a ni,” a ti bawk. Pu P.C.Zoram Sangliana chuan mipuite chu an awmdan leh Chanchintha in mawi a, an nun thianghlim taka vawng chunga he Kut hmang turin duhsakna a hlan a ni.

He hun hi Pu Vabeiha Hlychho, Director, Tourism Department chuan kaihruaiin, Pi Zosangliani, Deputy Director, Tourism Department hnen atangin thusawi ngaihthlak a ni bawk. He Kut hawnnaah hian Bangladesh MP, Pu Asaduzzaman Noor leh a nupui, Pi Shaheen Akhter leh Prof. Muntassir Mamoon, Dhaka University leh a nupui, Pi Fatema Mamoon te bakah, state sorkar mi pawimawhte an tel bawk.

Anthurium Festival hi Tourism Department huaihawtin kum 2006 atanga hman tan a ni a, kuminah pawh item hmuhnawm leh benglut tak tak bakah, mipuite tana intihhlimna hrang hrang buatsaih a ni a, kuthnathawkte leh thlai thar zuartuten dawr (stall) hrang hrang sawmnga chuang an hawng bawk a ni.