Ni 3 awh tur Anthurium kut, 2016 chu vawiin khan Reiek ah hman tan a ni a, Inrinni khian a tiak ang. Tourism Minister Pu John Rotluangliana chuan Festival hi a hawng a. Parliamentary Secretary Pu TT Zothansanga chuan hawnna inkhawm kaihruaiin ZIDCO Chairman Pu Lalrobiaka, MLA bakah sawrkar mipawimawh thahnem tak, ram chhung leh pawn atanga lokal zinmite leh Mizoram hmun hrang hrang atanga kalkhawm ten kut hlimawm tak an hmang a ni.

Khuallian Pu John Rotluangliana chuan Kut hawnna thu sawiin kalkhawmte chu kut hlim taka hmang turin duhsakna a hlan a. Kut hmangtute chu buaina siamtu ni lova remna siamtu ni zawk tur leh Mizoten pi leh pu atanga Kut kan neih zinga mi ni lo mahse sawrkar laipui hriatpuia kum tina hman thin Anthurium Festival hi Mizote hnam anga phuar khawmtu tangkai ni se a duh thu a sawi a ni. Tourism Minister chuan Reiek-ah Zokhua siamna tur project mumal tak duan a nih thu leh sum pawh cheng nuai 211.50 hmuh a nih thu sawiin Eco-Tourism lam hawia hmalak nan cheng nuai 600.08 bakah a panna kawng internal leh approach road siam that nan cheng nuai 128.57 hmuh a nih thu a sawi a. Tourism hmasawnna tura sawrkar hmalaknaah a neitu mipui an pawimawh a, hnam dang mikhualte mithmuha Mizo hnam ti mawi tu leh mikhualte laka thatchhuaha, biak nuam leh hawihawm nih tum theuh turin kalkhawmte a chah a ni.

He huna thusawitu dang ZIDCO Chairman Pu Lalrobiaka, bialtu MLA ni bawk pawhin Reiek khuain kum tin deuh thaw Anthurium Festival a thleng thin chu lawmawm a ti a. He festival hi a neitu Mizoten kan hlut thiam phawt chuan midangin min hlutpui ve mai dawn tiin mipui mimir a duh apiang tana len theihna tur leh tourist-te tana ennawm leh tlawh chakawma siam tura ngaihtuahna hman zel tul a tih thu a sawi bawk.

Anthurium Festival Ni hmasaberah hian mal zai, a huhova zai leh hnam lam hrang hrang en leh ngaihthlak tur a awm a. Ei leh in tuihnai tak tak eitur awmin, Mizoram KVI chuan an thilsiam chhuah chi hrang hrang lei theih turin an phochhuak a. Hnam incheina nen a thlalakna leh milarte thlalakpui theihna photo booth siam a ni a, anthurium chi hrang hrang mipui hmuha pholanna hmun siam a nih bakah Mizo kutchhuak bungrua leh ei tur chi hrang hrang zawrhna hmun a awm bawk. Festival programme a kal mek lai hian Evergreen Tours & Travels buatsaihin Wall climbing Competition, Go Mizoram buatsaihin Tree House, Ziplinning, Sky Skateboarding leh a duh tan puan in a riah nghal theihna siam a ni bawk a. Mizoram Rifle Association chuan Rifle Shooting Competition leh MUP buatsaihin Mizo Sairawkherh inperh siak buatsaih a ni bawk.