No.2799/2021-2022
Aizawl, the 30th October: Nizan khan Tourism enkawltu Minister Pu Robert Romawia Royte chuan Anthurium Festival 2021, a ni hnihna leh a kharna ni bawk chu Vanapa Hall ah a hmanpui a. Tarlan tawh angin, COVID-19 hrileng avangin mi tlemte chauh sawm niin, Mizoram chhung leh pawn atangin a duh apaingte tan chhim theih turin Festival hi TV leh internet kaltlanga live a pekchhuah a ni.
Tourism enkawltu Minister Pu Robert Romawia chuan India hmun hrang hrangah Mizoram chu anthurium thatna hmun tia hriat lar a nih tawh avangin leh mi tam takin hlawhtling takin eizawn nana an hman avangin a hming chawia Kut neih chu a inhmeh hle nia a hriat thu sawiin a hming chungchangah hian ngaituahna zau tak kan put thiam a tul thu a sawi. Anthurium chingtu ten a zawrhna lam an mahniin an in ngaihtuah chu fakawm tiin uar leh zau zawka Mizoram mai nilo, hmun danga awm Zofate pawhin ching se tiin a duh thu a sawi.
Tourism Department chu khualzin leh a kaihhnawih chungchang dan te, Mizoram Responsible Tourism Policy 2020 a ruahman te, inkaihhruaina leh zawm tur dan hrang hrang duan chhuahte hian awmze nei zawkin tourism industry hi kalpui a tum ber a ni tiin Minister chuan hengte hi tourism a lian zawk a than zel a pawimawh hle nia a hriat thu a sawi a. Hengte behchhana DPR siamte chuan hmasawnna tam tak a thlen ngei a beisei thu a sawi bawk. Tourism chu hmathlir thui tak neia Sawrkarin kalpui a tum thu sawiin tourism hi kan zavaia tan leh kan zavai ta a ni a, Department pakhat chauhin hlawhtling takin a kalpui thei lova kan zavaiin kan tan tlan a ngai a ni tiin mipuite leh Department hrang hrang te chu thawhpuiah a sawm a ni.
Nizana Anthurium Festival 2021 programme ah hian Pu V Lalengmawia, Director Tourim Department chuan mipuiin Department an tawiawm that avangin lawmthu a sawi a. Dr. E. Saipari, Director, Horticulture Department pawhin thusawiin anthurium chingtu ten anthurium an hlawhtlinpui dan te a sawi a ni. Programme ah hian zai, hnam lam, anthurium girls parade, dance choreography te entir a ni a. Tourism advertisement video hrang hrangte, tourism ad te pawh programme ah tarlan a ni a. Pu Saitluanga, Joint Director Tourism Department in lawmthu sawiin hun a khar a ni.
