Vawiin khan Health Minister Pu Lalrinliana Sailo hovin Chanmari YMA Hall-ah 'Anti Malaria Month Advocacy' (Malaria beihpui thlakna thla) meeting neih a ni.

Malaria Do beihpui thlakna hawngtu Health Minister Pu Lalrinliana Sailo chuan State Vector Borne Diseases Control Programme (SVBDCP) in Malaria Do na atana Drama Competition a buatsaih lawmman semna a neih zawhah thu sawiin Malaria natna avanga thi kan la awm thin chu pawi a tih thu leh Mizoram zim te, tlawmngai pawlte nen a thawhhona tha tak awmna hmunah hian Malaria avanga thihna awm thin hi kan tih bo theih ngei a rin thu leh hemi tihhlawhtling tura thawhhona tha leh zual te, thawktute pawh in tumna tak tak nena hna thawk tura chahin mipuite pawhin mithiam zawk te thurawn ngai pawimawh a kan zawm a pawimawh, a ti. Health Department chu mite tana damna hna thawktu kan nih angin malsawm zel tlak department kan nih theih nan, Missionary rilru pu chunga, Pathian tihna tak tak nena hna thawk theuh turin kalkhawmte a chah bawk. Malaria hi kan vai do a tul a, natna reng reng hi tute pawhin kan vei theih a, mahni hriselna theuh kan ngaihpawimawh a ngaih thu leh he Malaria Do thla pawh hi a thlawn maia hmang lovin rilru thar pu chunga tumruhna nena Malaria natna a lo tlem ngei a beisei thu a sawi bawk.

Vawiina meeting hi Dr.C.Lalthanmawia, Director of Health Services-in a kaihruai a, power point presentation hmangin malaria lama Mizoram dinhmun leh hmalak mek leh hlawhtlinna te a tarlang a. Health Director chuan kum 2011 February thla thleng a Malaria avanga thi zat chu mi 2 chauh anla awm thu leh hetih lai hian thisen lak zawng zawng mi 17002 zing ah Malaria hrik mi 805 ah hmuh anih thu leh mi 768 zet chu PF anih thu a tarlang bawk. Mizoram district hrang hrang awmah Lunglei District huam chhungah Malaria hrik pai an tam ber thu a tarlang tel bawk a ni. India ram pumah Malaria natna kum 2015-ah chuan kum 2008-a malaria case awm zawng zawng let 50 a tih tlem tum a nih thu a sawi. Tun hnai maia Thanzamasora khua a mi 5 thihna pawh kha Malaria avanga thi ni lovin natna vang tak 'Indian Pig Pisas' natna a nih thu a sawi bawk.

India ram pumah June thla hi Malaria Do thla atana hman thin ni mahse, Mizoramah chuan fur ruahtui a tlak hma thin avangin leh inbuatsaihna hun a tam zawk theih nan kum 2010 atang khan April thlaah hman thin a ni. Tunah hian a thawhkhatna atan DDT pawh ram pumah kah a nih tawh thu leh kum tin March leh August thla chhungin vawihnih in tinah DDT kah thin a ni bawk. Malaria laka kan lo him zawk theih nan kan inleh a vela tui tlin theihna reng reng tih bo a tul takzet thu tarlan a ni bawk.