Arunachal Pradesh (AP) sorkar rawn tirh AP Press Team te chuan nimin khan I & PR Department, Mizoram kaihhruaiin Reiek khua a Mizo Khua (Mizo Typical Village) an tlawh a, Tourism Department ten lo dawngsawngin hlim takin hun an hmang a, Aizawl Bazar leh hmun dangte pawh an tlawh a ni.

Nizan khan Aizawl Chaltlang Tourist Lodge-ah Information & Public Relations Departmnt buatsaihin chawhlui kil hona leh inkawm hona hun tha tak Mizoram Journalist Association (MJA) Hqrs. hruaitute leh Asian News International (ANI) TV Team Delhi te nen an nei bawk.

AP Press Team te chuan Mizoram an rawn tlawh hun chhung tawite ah zir tur tam tak, sorkar hmalakna ah te, Mizo mipui taimakna leh hawihhawmna ah te an hmuh thu an sawi.

I & PR Department hnathawh danah entawn tur tam tak an hmuh thu sawiin, Officer leh Cameraman ten mipui mamawh media te kaltlanga an puanzar thin te, MJA leh I & PR chu pumkhat ang mai a an thawhho theih dante state dang tan entawn chi anih thu sawiin, hetiang ang anih chuan I & PR leh media mite chu mipui leh sorkar department ten an ngai pawimawh lo thei lovang tiin, Chief Minister ber pawhin I & PR leh Media te chu a duhsak tih an hmu chu awhawm an ti.

Journalist Welfare Society Mizoram sorkar-in a siam chu tha an tiin, Welfare Fund atanga Journalist ten I & PR kaltlanga hamthatna an dawnte chu neih ve ngei theih nan an state sorkar-ah thlen an tum thu AP Team te chuan an sawi.

AP Team te hian vawiin zing khan Aizawl chhuahsanin an state lam an pan leh ta a, remchang hmasa berah rei zawk cham turin lo kal leh an duh thu an sorkar ah thlen an tum tih an sawi.