Mizoram State Election Commission Chairman Pu C Ropianga chuan Chakma Autonomous District Council inthlan vawi 9-na hun tur atan April 17, 2013 (Nilaini) ruat a nih thu a pisa-ah vawiin khan thuthar lakhawm tute hmaah a puang.
CADC inthlan tur atan Notification 20.3.2013 hian chhuah a ni ang a; 1.4.2013 (Thawhtanni) tlai dar 5 thleng hming pek theih a ni ang. Hming pek luh te chu 2.4.2013 (Thawhlehni) zing dar 11 atanga dar 3 chhungin endik a ni ang a, inhnukdawk duh te tan 3.4.2013 (Nilaini) tlai dar 3 thleng hun pek an ni ang. 17.4.2013 (Nilaini) zing dar 7 atanga tlai dar 5 chhungin vote thlak a ni ang. Vote tla te chu 19.4.2013 (Zirtawpni)-ah zing dar 8 atanga chhiar tan a ni ang. Chakma Autonomous District Council inthlan kaihhnawih zawng zawngte chu 26.4.2013 (Zirtawpni) ral hma a zawh fel vek tur a ni.
CADC General Election vawi 9-naah hian a tum khatna atan Electronic Voting Machine hman a ni dawn a, Mizoram inthlana a vawikhatna ni turin Voter Slip with Photograph (VSP) he inthlanah hian hman (introduce) a ni ang. VSP-ah hian Voter te thlalak, hming, EPIC No., Voter Serial No., Polling Station hming leh number, inthlan ni leh hun te bakah tul dang te a chuang a. EPIC an tibo a nih pawhin he VSP chauh pawh hian vote a thlak theih ang. EPIC leh VSP tibo te tan pawh Polling Booth tinah VSP Facilitation Desk siam a ni ang a, hemi hmunah hian Station Officer hnen atangin duplicate VSP a lak theih ang. Returning Officer leh Asst. Returning Officer ten Polling Station tina Station Officer-te kaltlangin inthlan hma ni khat la awmah in tinah kalin VSP hi an semchhuak vek dawn a ni. CADC inthlan atan Observer pahnih ruat fel a ni tawh bawk.
Inthlan puan a nih tak avang hian inthlan kaihhruaina, tih tur leh tih loh tur (Model Code of Conduct for Elections to Chakma Autonomous District Councils) chu Lawngtlai District-ah hman tan nghal a ni.
