30/2022-2023
Lawngtlai Ṭau thla ni 4, 2022: Lawngtlai District Civil Supplies Officer (DCSO) Pu Lalrinsanga chuan March 28, 2022 khan a hnuaia mi ang hian Ration Card leh Aadhaar seeding chungchangah office order a chhuah.
"The Mizoram Food Security Rules, 2015, Rule 9 (7)-in a tar lan angin Targeted Public Distribution System (TPDS) hnuaia beneficiary-te hi Ration Card nei tur chuan Aadhaar an neih a ngai a. Tin, Ration Card Management System (RCMS)-ah hian Aadhaar tel loin ration card a pek chhuah theih loh avangin Food, Civil Supplies & Consumer Affairs Department chuan kawng hrang hrangin mipuite hnenah ration card leh Aadhaar thlun zawm a ṭul thu hriattirna a lo chhuah tawh ṭhin a ni. Amaherawhchu, COVID-19 hripui avanga nunphung nasa taka a khaihlak avang leh tum anga chet lak a harsat avangin tun thleng hian Ration card leh Aadhaar thlun zawm lote pawhin an ration an chân loh nan Special Allotment siamsakin ePoS hmang lovin ration pek ṭhin an ni.
"He kalphung hi sawrkar laipui thupek kalh a nih avangin heti anga ePoS kal tlang lova (Manual) ration inpek reng hi a remchang tawh lo va, nunphung pawh a pangngai chhoh tawh avangin sawrkar laipui pawhin a thupekte khauh taka kengkawh turin State sawrkar a rawn hriattir tawh a ni.
"TPDS Control Order, 2015 clause 8 (4) chuan electronic platform (ePoS device leh digital weighing scale) chauh hmangin retailer (FPS Dealer)-te’n TPDS Beneficiary-te hnenah ration an sem ṭhin tur a ni a tih laiin Aadhaar leh ration card thlun zawm lote tan ePos device hmangin ration a lak theih loh va; chu vangin, Aadhaar leh Ration card la thlun zawm lote chuan ni 20 April, 2022 ral hma ngeiin an thlun zawm vek tur a ni a. Hemi hun chhunga Aadhaar leh ration card thlun zawm ve lote hnenah May, 2022 aṭanga an thlun zawm hma chu ration pek an ni tawh lo ang a, an sawi buai thei lo bawk ang."
Attachment
- Loading attachment...
