Vawiin khan Mizoram Youth Commission (MYC) leh Department of Sainik Welfare & Settlement tangkawp chuan Vanapa Hall-ah zirlaite tan ‘Armed Forces Awareness Campaign’ an buatsaih a. He hunah hian Home Minister Pu R.Lalzirliana chu Khuallian niin Parliamentary Secretary Col(Rtd).Z.S.Zuala chu Khual Zahawm a ni bawk.

Armed Forces Awareness Campaign MYC Member leh IGNOU Regional Director ni bawk, Pu S.R.Zonunthara kaihhruaiah Home Minister Pu R.Lalzirliana chuan Mizo thalaite zingah lehkhathiam tak tak sipaia tang chak si, a kawng hre si lo tam tak awm te tan hetianga Awareness Campaign huaihawt a ni thei chu lawmawm a ti a. Mizote chu tunhma atangin sipai chi hrang hranga lut kan awm thin a, a hmingtha leh chhuanawm ber pawl kan ni thin chuan hnam duai lo leh dawizep lo kan nihzia a tilang chiang hle, a ti bawk. Tunah phei chuan sipai - Army, Air Force leh Navy - ah mipa tan chau ni lo, hmeichhia te tan pawhin hnathawhna tur kawng tam tak hawn belh a ni chu Mizo thalaite tan eizawnna tha tak a nih theih thu Minister chuan a sawi bawk a. Zirlai naupang leh thalaite chuan eizawnna atan eng kawng pawh zawh se, Pathian tih leh nu leh pa thuawihna nen an nun kawng hmang chho turin a fuih bawk a ni.

Khual Zahawm Col.Z.S.Zuala pawhin zirlai naupangte chu rilru nghet tak leh tum nei tlata lehkha zir turin a chah a. A nun hmalam huna sipaia a tan lai te sawilangin Pu Zuala chuan Mizo sipaite chu a huai pawl an nih ziah bakah hotute rinrawl ber an nih thin thu a sawi a. Tun hnaia Assam Regiment hnuaia sipai Passing-out Parade-a a telnaah contingent hruaitu leh Parade Commander-te chu Mizo tlangval an ni thin a, hei hian nasa takin thalai dangte pawh a tiphurin a cho ngei a beisei thu a sawi a. Col. Zuala hian Army-a luh dan kawng hrang hrang chungchang zirlaite a hrilh bawk a ni.

MYC Chairman Pu Hmingdailova Khiangte pawhin thu sawiin hmarchhak bialah Mizoram chu lehkha chhiar tam ber (62%) awmna state a ni a, amaherawhchu Mizote kan chhiar duhzawng chu thawnthu leh phuahchawp thil (fiction) a tam ber a ni, a ti a.

MYC-in UPSC tan a thlawna coaching class te buatsaih thin mahse, a tirah 100 vel admission ti an awm laiin a tawp lamah chuan 10 pawh an tling zo mang lo thin chuan Mizo thalaiten tumruhna leh teirei peihna an tlachham deuha a hriat thu a sawi a. Mizote chu tribal kan nih avangin vanneihna tam tak sorkarin min siamsak a, state chhungah chauh ni lo, Central sorkar hnuaiah leh kawng hrang hrangah reservation hmanaga duhsak kan hlawhzia hriain theihtawpa bei turin zirlai kalkhawmte a chah a ni. Vawiina zirlai leh thalaite hi nakinah an nu leh pa te tan nghahfak an nih ngei theihna turin lehkha an zirlai atanga rilru mumal tak put a tul a ni, a ti.

MYC Secretary Pu J.T.Vanlalngheta chuan Mizo thalaite hmangaiin Mizoram Youth Commission chuan Rajiv Gandhi Institute of Youth Development, Tamil Nadu nen Inremna Thuthlung ziakin Youth Resource Centre din thuai an tum thu a sawi a. Air Force-a luh dan kawng hrang hrang chungchang Wing Cdr. (Rtd) Lalzawma’n a sawi bawk. Sainik Welfare & Settlement Director Surgeon Lt. Commander Pu Lalnuntluanga pawhin Armed Forces peng 3 - Army, Air Force leh Navy - hnuaia hnaruak awm thin leh a luh dan chungchang chipchiar takin a sawi a. Armed Forces-a luh thatna sawiin mahni inthunun nan, nun changkang zawk zir nan, khawvel zau zawk hmuh nan, infiamna lam tam tak a awm thu te, a hlawh leh behbawm a that zia thu te bakah ram tana mi tangkai nihna a ni tiin zirlai kalkhawm te nasa takin a fuih a ni.

Armed Forces-a luh dan hrechiang duh tan Sainik Welfare & Settlement Office-ah a zawhfiah theih a ni. Vawiin Armed Forces Awareness campaign-ah hian St.Paul’s HSS, Govt. Mizo HSS, Govt. Republic HSS, Oikos HSS leh Govt.J.L. HSS zirlaite an kal thahnem hle a ni.