Zemabawk, Aizawl-a awm 457 Field Hospital of Indian Army chuan nimin atang khan an thiamthil hrang hrang mipuite en theih turin an phochhuak a. Indona leh boruak ralmuang lo (emergency) kara sipai leh mipui mimir inhliam an enkawl dan leh hmanrua hrang hrang an neihte chu Helipad, Thuampui hmunah hetiang hian an entir a ni:

 

 

1). Medical Aid Posts : Hemi hnuaiah hian doctor 1 leh para-medical staff 6 an awm a, ambulance hmangin inhliamte first-aid an pek hnuah an phur chhuah dan.

2). Advance Dressing Station : Hei hi puan in (tent) a ni a, hetah hian inhliamte darkar 24 chhung an kawl a, tlangram leh motor luh theih lohna hmunah te pawh sipaiten an phur chho mai thin a ni. Minute 15 chhungin he ADS hi hman theihin an inpeih fel theih a ni.

3). Forward Surgical Centre : Hetah hian operation theatre, x-ray khawl leh laboratory te dah a ni thin a, tum khatah damlo/inhliam mi 45 lai an leng a ni.

457 Field Hospital Commanding Officer ni mek Col.S.R.Bishnoi chuan he field hospital hi sipaite tan chauh ni lovin a tul chuan civilian mipui tan pawh rawngbawlsak turin an inpeih reng thu a sawi a. Nimin khan Mizorama rawn zin Minority Commission member-te pawhin he Field Hospital Display hmun tlawhin an hmanrua leh hmalakna hrang hrangte chu an fak hle.