2237/2025-2026

Aizawl, 15th November, 2025 : Art & Culture Department buatsaih Hmanlai Mizo Nun a taka entirna "Living Museum" inrinni apianga neih thin chu vawiin November 15, 2025 khan neih chhunzawm leh a ni a. Vawiin hian Bible Society of India, Aizawl Auxiliary Bible House hawng tura rawn kal te – BSI President, Vice President, General Secretary, Treasurer leh an thawhpui mipawimawh tak tak 30 velin Living Museum hi an tlawh a, Art & Culture Department chuan Khualtha anga lo dawngsawngin Living Museum an fan pui a ni. Anni bakah hian MZU atangin zirlai 100 chuang bakah RIPANS atangte leh zirna in hrang hranga zirlaiten Living Museum hi an tlawh a hlawkthlak an ti hlawm hle a ni.

Living Museum Show hi a bul tan nan kartin Inrinni apianga neih tura ruahman a ni a. Art & Culture Department chuan thla hmasa October ni 25 bakah tun thla November ni 1, ni 8 leh vawiin ni 15, 2025 ahte hian Living Museum hi a buatsaih tawh a, buatsaih chhunzawm zel tur a ni.

Mizoram State pawn atanga khualzin lo lut an pun belh zel avang te, tualchhung mipuite Local Tourism-ah kan harh thar zel avangte bakah Mizo Culture leh Tradition chawilar zel nan Living Museum hi buatsaih a ni. Thangthar leh naupang zawkte’n Mizo nunze mawi leh chin dan hrang hrangte a tak ngeia an hmuh leh tem chhin theih nan te, zirlai naupangte tana tangkai tur leh an zirlaibua awmte an hriatthiam lehzual theih nan leh khualzinte’n kan hnam nun an hmuhfiah theihna tura buatsaih Living Museum hi Inrinni apiangin Entry Fee Rs. 100/- chawiin a chhim theih dawn a; show hi hun hnihah then niin, First Segment chu 12:00 Noon - 01:30 PM-ah neih a ni ang a, Second Segment chu 02:00 PM - 03:30 PM-ah neih a ni ang. Mizo nun dan chi hrang hrang, he’ng - Live Demonstration of Mizo Village Life, Traditional Dance, Folk Song & Dance, Indigenous Games, Traditional Cuisines, Traditional Costumes te entir thin a ni.