Vawiin chawhnu dar 2 khan Art & Culture Minister Pu P.C. Zoram Sangliana chuan Chairman anih angin Aizawl YMCA Board of Directors meeting ama office ah a neih pui. He meeting-ah hian Regional Council Meeting of YMCA, Guwahati-a neih zawh tak thlirletna leh Aizawl YMCA Annual meeting neih dan tur an thlir ho.
Regional Council of YMCA of North East Region hi Guwahati-ah June 4-6, 2010 khan neih a ni a, hemi tum hian kum 2010 - 2012 Regional Chairman atan Aizawl YMCA President Pu P.C. Zoram Sangliana chu thlan a ni a. Hetianga Regional Chairman atana thlan tlin a ni hi Aizawl YMCA Board of Directors chuan an lawmpui thu an tarlan rualin chhuanawm an ti tak zet a ni.

He Board of Directors meeting-ah hian Aizawl YMCA President Pu P.C. Zoram Sangliana chu Mizo Cheraw Lam Guinness World Record Mizote min siam sak avanga chawimawina leh lawmpuina hlan a ni a. Hemi rual hian Aizawl YMCA Board of Directors atangin an Director vek Dr. Ramdinmawii chu rawngbawl tura inpe a Arunachal Pradesh-a Missionary a kal tur chu a chhuanawm an tiin lawmpuina citation an hlan nghal a ni.