2410/2024-2025

Aizawl, October ni 7, 2024: Vawiin chawhnu khan Art & Culture Minister Pu C. Lalsawivunga hovin Aijal Club Conference Hall-ah Chapchar Kut hman dan chungchanga inrawnkhawmna leh sawihona, Consultation Meeting buatsaih a ni.

Art & Culture Minister chuan hlawhtling takin, mipui ngaihven tak Chapchar Kut hman a lo nih tawh thin thu a sawi a. Vawiin inrawnkhawmna chuan Kut lo hman tawh dan te a tha love tih emaw a hlawhtling love tihna lam a nih loh thu sawiin Minister chuan hlawhtling taka Kut kan lo hman tawh thin chu huamzau zawka hma sawn belh zel theihna a awm em ti a inrawnkhawmna chu buatsaih a nih thu a sawi. Minister Pu. Lalsawivunga chuan hnam ziarang, culture leh tradition vawn nun kawngah te, hma a sawna a than zelna kawngah te hian mipui hi a tam thei ang ber tel se an duh avanga inrawnkhawmna buatsaih a nih thu a sawi a. Chapchar Kut kan hman danah Hnam kalphung leh ziarang humhim chungin zawi zawka khawvel hmuh tura chhawpchhuah chu rilru ah awm se a duh thu a sawi.

Vawiin inrawnkhawmnaah hian Art & Culture Secretary Pi Florence Zotluangpuii chuan kalkhawmte lawmna thu a sawi a. Consultation Meeting ah hian sorkar department thenkhat leh pawl hrang hrang aiawh leh mimal sawm bikte kalkhawm in, Chapchar Kut hman tawh dan leh hman zel dan tur atana Art & Culture Department in a buatsaih zawhna leh chhanna te sawiho in, rawtna hrang hrangte neih a ni a. Pu Vanneihtluanga, Chanmari, Aizawl chu Moderator a ni.