342/2023-2024

Nimin khan Aizawl District Football Association (ADFA) Silver Jubilee lawmna chu Art & Culture Auditorium, Berawtlang ah neih a ni a, Art & Culture Minister Pu R. Lalzirliana chu khuallian niin a hmanpui.

Khuallian chuan Aizawl District Football Association (ADFA)- in harsatna tam tak paltlang a kum 25- na hmel a hmu thei chu hruaitu hmasate inpekna leh thawhrimna rah a ni tiin tuna hruaitute pawhin an hnung zui a thahnem ngai taka thawk zel turin a chah a. Football chu Mizote ngaihsan leh ngaihnat tak, veng leh khawtinin an tuipui em em,inpumkhatna thlentu a nih angin football hruaitute mawhphurna pawh a sang hle a ni, a ti. Thalai tam tak ruih hlo laka an filhlim theih nan infiamna uar a ngai ni a a hriat thu sawiin football tihhmasawn chu ruihhlo do na kawng pawimawh tak pakhat a ni thu a sawi a. Mahni sum leh pai sen ngaih chang a tam hle a, football hmangaihtu tak tak tan lo chuan hruaitu nih a har a, ADFA hruaitute pawhin sum leh pai, tha leh zung tam tak an seng tawh a,a hlawhtlinna pawh hmuh niin Aizawl District atangin footballer tha tak tak an lo chhuak mek zel tiin an hnathawh chu a fakawm hle tih a sawi a ni.

Minister chuan football chu India leh khawvel hriata Mizote hming chawimawitu ber pakhat a nih thu sawiin sawrkar pawhin theihtawp chhuahin Football hmasawnna turin tan a la mek zel a ti a. Sports Minister hmalakna zarah Mizoram chhungah phullem phah mek anih thu tarlangin, ram changkang zawk chauhin an neih tur a ngaih thin kha tunah chuan mizo te ngei pawh phullem chungah Football an khel tawh a ni, a ti.

Football Association hrang hrangte chu Zofate tan a hlawhtlinna thlentu pawl lian ber an nih thu tarlangin Pu R . Lalzirliana chuan Association-in harhsatna tam tak an tawh chang a beidawng mai lova hmalam pan tlat turin a chah a.Mizoram sawrkar chu a theihna zawn a anmahni puih turin a awm reng thu a sawi .Football hruaitute chu Football hmasawnna chauh ni lovin zofate hmasawnna leh iningrualna tur a thawk an ni tih in hre reng turin a chah bawk a ni.

Mizoram Football Association (MFA) aiawh a thusawitu Pu Lalnghinglova Hmar chuan football hruaitu ni tur chuan inpekna tak tak leh chan huam a thawh a ngai a ni, a ti a .Aizawl District Football Association hruaitute inpekna rah hmuh mek a nih thu tarlangin player tha tak tak chherchhuakin eizawnna atan a hmang tam tak an awm a ni tiin hruaitute inpek leh thawhhrimna fakawm a tih thu a sawi a.Tun dinhmun ah refree in daihlohna a lian hle tih sawiin helam a hma la turin ADFA hruaitute a ngen nghal a ni.

Pu Lalbiakhlua, Hon.Secretary- in report pekna a nei a. Tun dinhmun ah ADFA- hnuaiah hian Zone hrang hrang paruk a awm mek a ni. Kum 2022-2033 chhungin ADFA- chuan Club 34 enkawl mek in - I Division Club -8; II Division Club -8 leh III Division Club-18, te an ni.

Vawiin ADFA Silver Jubilee lawmna Programme- hi Er.Lalzawmthanga, President ( ADFA) chuan a kaihruai a, Pi Juliet Lalengkimi, Executive Member (ADFA) in hunserh a hmang in Pu Laldingliana, Vice President (ADFA) chuan lawmmthu sawina neiin hun a khar a ni.