Vawiin  zing dar 11:00 khan Mizoram Upa Pawl, Aizawl West Area Conference vawi 19-na chu Kanan Veng Badminton Hall-cum-Youth Recreation Centre-ah neih a ni a. Pu P.C. Zoram Sangliana, Art & Culture Minister chu khuallian a ni.

Inkhawm hi Pu P.C. Sapnela, President MUP Aizawl West Area-in a kaihruai a. Rev. Lianzuala’n hunserh a hmang. Pu Ramsanga chuan Upa Member kalkhawm hmaah “Hnam zahawm tehna chu upate dinhmun atangin teh a ni tlangpui thin. Pawl dangte nena thawhhonaah pawh in dinhmun sawifiah theitu ber tur leh chhang thei tur chu nangmahni in ni”, a ti a. In tu leh fate’n vawiin dinhmun kan thlen theih chhan hi nangmahni in ni reng chung hian kan chawimawi zawh loh thin naah che u ngaihdam kan ngai a ni”, a ti bawk. “Kan hnam Tradition mawi takte hi hnam dangte’n min hriatsak a tul thin a, Mizo thawnthu tha tak tak in hriat angte hi ziaka dah tha turin ka chah che u a. Khawvel hriata Cheraw kan pholan turah pawh hian in tu leh fate phal takin rawn thawh ang che u” a ti bawk. Upate chu tu leh fa, chhungkua leh ram tan malsawmna an lo nih thinna te chhunzawm turin a chah a. Kan ram hian a taka sual do ngam, Josefa anga pindan chhungril, tuma hmuh lovah pawh ’ Aih’ ti ngam a mamawh avangin, hnam siam tha turin tan lak tlan a tul a ni tiin kalkhawmte chu an dam chhung nite pawhseia awma Pathian malsawm sak zelna a duhsak thu a hlan bawk.

Conference-ah hian Member thite sunna neiin zaipawl intihsiakna an nei bawk a. Khuallian hian Conference tanpui nan Rs. 10,000/- leh Unit 11 (sawmpakhat) tan lehkhabu ‘Mizo Rohlu’ a hlan theuh bakah zaipawl ti thate tan leh thlengtu Unit tan Silpauline 4 (pali) a pe bawk.