Vawiin chawhma dar 10:30 khan Pu P.C. Zoram Sangliana, Art & Culture Minister chuan Govt. J. Buana College Freshers Social Saikuti Hall-ah a hmanpui. He programme H. Muansangpuia Vice President SU Govt. J. Buana College in a kaihruai a ni.

Minister chuan thu sawiin Govt. J. Buana College Freshers Social hmanna  a khuallian tura sawm a nih naah lawmthu sawiin Sikul naupang te a ngaih pawimawh thu a sawi a. A sawi zelna ah zirlaite hian tum mumal tak kan nei tur a ni a, chu kan tum tihlawhtling tur chuan theihtawp kan chhuah a ngai a ni, a ti. College kan kal pawhin nu leh pa te phurrit siam lovin mahni intodelh chunga zir hram kan tum tur a ni, a ti. Tunlai naupang te mutna chang hre lo thawhna chang hre lo kan tam lutuk hi nu leh pa ti luhai tu a ni, a ti. College kal thar zawng zawngte college ti hmingtha tu ni tur leh Zoram nghahfak ni theuh tur a tan la turin a fuih. India rama kan awm chuan Hindi thiam te pawh a ngai a, thil reng reng thiam silo thiam anga kan awm hi a zahthlak zawk a ni, a ti. Zirtirtute pawh zirlaibu mai duh tawk lovin thil thar zirtira anmahni ngei pawh zirtlak ni tura an nun a ngai a ni, a ti. Mahni hnam zia leh rang vawn that hi kan tihtur a ni tih hria in kan hnam lam  Cheraw pawh Guinness World Record  ah hial kan dah a ni, a ti. Zirlaite tumah in ka naupang lutuk ti lovin kan naupanna ngainep mai lo turin kan nun a ngai a ni, a ti .  Kan nitin eizawnna a ni emaw zirna a ni emaw Lal Isua nen thawk dun ila Lal Isua ka duh ber min hruaitu atan ti theuh turin tan la in he khawvel mai kan nun piah lamah chatuana nung tura inbuatsaih chungin kan damchhung hun hmang thiam theuh turin kalkhawmte a chah. Kum 2010-2011session ah hian kalthar 229 te nen tunah Govt. J. Buana College ah student 367 an awm mek a ni.