1153/2024-2025

Aizawl, 11.07.2024: INTACH Mizoram Chapter chuan Pu Buanga (J.H. Lorrain) lehkha leh sulhnu pawimawhte chu bu pali ah siamin, Mizoram Sawrkar leh Kohhran leh Zirna in archive/ library a dah turin vawiin khan hengte hi an hlan a. Art & Culture Minister Pu C. Lalsawivunga hovin a pisa ah lehkhabu hlanna hi hman a ni.

Minister Pu C. Lalsawivunga chuan Mizo history leh ziarang (culture) zirchianna leh humhalh kawnga INTACH Mizoram Chapter te, ziak mite leh pawl dang dangin hma an lo lak tawhna chu fakawm a tih thu a sawi a. Thil hlui hlu leh pawimawh tak takte vawnthat kawngah Sorkar Archive mai bakah kohhran, zirna in leh pawl hrang hrangin thahnemngai taka hma an lak chu lawmawm tiin, sorkar ang zawng pawhin public record vawn kawngah nasa zawka tan lak a tul thu te a sawi tel a. Art & Culture Minister chuan vawiina INTACH Mizoram Chapter te hmalaknaa lehkhabu an hlan chu hlu a tih thu sawiin, mi tam takin an tangkaipui a beisei thu a sawi a. Mizoram a cheng te'n khawtlang leh sakhua nun a inpumkhatna leh inlungrualna kan neih hi hnam hrang hrang ni mah ila tawng khat leh sakhua hmun khat nei theia kan awm avang a nih thu sawiin, chu chu Zosap missionary te'n sulhnu an hnutchhiah pawimawh tak pakhat a nih thu a sawi.

INTACH Mizoram Chapter chuan Mizo ram leh hnam ro, thil hlu leh pawimawh - khawih theih leh theih loh te, hmuh theih leh hmuh theihloh chenin - zawn chhuah a, vawng him turin theihtawpin kum 1984 atang khan hma a la a. Chumi hmalakna zinga pakhat chu Pu Buanga Dictionary an tih mai [Dictionary of the Lushai Language by James Herbert Lorrain (1940)]-a a kimlo lai zawn chhuah a ni. Pu Buanga khan a Dictionary siamah khan thil pawimawh tak tak, phek engemaw zat a kim lo tih a tarlang a. Chungte chu zawn chhuah tumin hma an la a. Pu Buanga sulhnu chu Angus Library & Archives, Regent Park College, Oxford University, United Kingdom-ah a awm thu hriat a ni a. Pu Buanga Dictionary-a kim lo tak chu a lo awm lo va. Mahse Pu Buanga sulhnu thil tam tak leh thildang engemaw zat, la hmuh ngai loh chu haichhuah a ni ta a. Hengte hi Bu 4-ah siamin chungte chu (i) Pu Buanga lehkhathawn leh a lehkha dawn thenkhatte; (ii) Pu Buanga kut hnu thenkhat, Dictionary chungchang leh thil dangte, (iii) Whilom Head Hunters (iv) Darphawka Mumang - Ziaktu: C Chama, Theiriat te a ni a.

Vawiin hian heng lehkhabute hi Mizoram State Archive, Tribal Research Institute, Mizo Language Development Board, Mizoram Legislative Assembly, Mizoram University Library, Synod Archive, Baptist Church leh Aizawl Theological College-te hnenah hlan a ni.

Vawiin inkhawm hi Pu Rin Sanga, IAS (Retd.) Convener, INTACH Mizoram Chapter chuan kaihruaiin, Dr. Lalbiakmawia Ngente Treasurer chuan report a pe a, Prof. J. V. Hluna, Co-Convener chuan lawmthu sawiin hun a khar a ni.