1420/2024-2025

Aizawl, the 2nd August, 2024: Department of History, Pachhunga University College (PUC) leh Art & Culture Department-te tangkawp buatsaih Mizo tobul chhuina, 'International Symposium on Mizo Origin : Exploring Narratives of Origin and Migration' chu vawiin chawhma dar 10:30 khan Art & Culture Minister Pu C. Lalsawivunga'n Seminar Hall, PUC ah khuallian niin a hawng.

Khuallian Pu C. Lalsawivunga chuan Mizo chanchin zirbing mi, mi thiam tak tak, zirtirtu leh zirlaite nena Mizo tobul chhuina International Symposium hman ho a ni chu lawmawm a tih thu sawiin, zirbingna buatsaih chuan Mizo history dik tak tarlan kawngah rah tha a chhuah ngei a beisei thu a sawi a. Mizo tobul leh thlangtlak dan chungchangah historian-te chhuizauna atangin thil hriat leh hmuh tur hrang hrangte awm bawk mah se, Sawrkar anga mizo tobul leh thlangtlak dan kimchang mumal taka puan a la ni lo chu veiawm a tih thu a sawi a. Ziaktu hmasate inpekna avanga Mizo chanchin  hriat tur a awm chu lawmawm a tih thu sawiin, tunhnaiah thangtharte zingah Mizo chanchin chhuichian duhna, Mizo tobul leh thlangtlak dan kimchang hriat duh an awm chho zel chu lawmawm a tih thu a sawi a. Symposium buatsaih chu Mizo tobul leh thlangtlak dan kimchang chhuichianna remchang, mumal taka history chhui nan hman ni se a duh thu a sawi bawk.

Art & Culture Minister chuan zohnahthlak hnam peng hrang hrangte tobul, thlangtlak dan leh khawsak zui zel dante dik taka kan hriat theih nan dawhkan atang mai nilo, uluk taka chhui turin a hmuna kalchilha zirchian a pawimawh thu sawiin, Sawrkar ang pawhin kan tobul leh thlangtlak dante kan neih a hun tawh a, hemi atan hian historian hmasa te'n sul an lo su tawh a, hemi behchhan hian tun aia fiah leh chiang lehzualin ziak ngeia dah theih tura tanlak a tul thu a sawi a. Ram hrang hrangah awm darh tawh mah ila, zohnahthlak vek kan ni a, kan tobul chiang taka kan hriat hi kan inunauna tih ngheh nan leh inpawhtlan nan a pawimawh hle a ni, a ti a. Hnam ziarang vawnhim leh zahpui lova chawilar deuh deuh a pawimawh thu sawiin, hnam anga kan bo mai loh nan kan hnam ziarangte kan chhawmnun zel a tul a ni, a ti bawk. 

Symposium hawnna hun hi Dr. Esther Laltlankimi, Head, Department of History, PUC chuan kaihruaiin Prof. H. Lalthanzara, Principal, PUC in kalkhawmte lawmna thu a sawi a. Pu Alfred Zothansanga Sailo, Freelance Researcher-in Resource person chanchin tlangpui a sawi hnuah Resource person atana sawm 'Hmasang Pipute Chanchin' tih lehkhabu ziaktu Pu Liandova (Dadova), Letpanchaung, Myanmar chuan mizo tobul chhuina leh thlangtlak dan presentation bengvarthlak tak a pe a ni. 

Symposium hi chawhnu lamah Dr. Rohmingmawii, Associate Professor, Department of History, PUC kaihhruaiin neih chhunzawm a ni a. He hunah hian Pu Michael Lalthanmawia, Freelance Researcher, Pu C. Lalnunchanga (Taitea), Author & Novelist leh Dr. Lalrinnunga Hmar, Associate Professor, Department of History and Ethnography, Mizoram University te'n resource person thusawi behchhan thlirna tlangdang atanga ngaihdan hrang hrang awm theite an sawi bawk a; sawihona bakah zawhna leh chhanna hun hlawkthlak tak hman a ni.

International Symposium on Mizo Origin: Exploring Narratives of Origin and Migration-ah hian Mizo history lama tuimite, College zirtirtu leh zirlaite an tel a ni.