Mizoram sorkara Art & Culture Department leh Sangeet Natak Akademi, New Delhi tawngkawp buatsaih ni 3 awh tur ‘SWAR SUDHA - Festival of Choral Music & Instrumental Ensemble’ chu vawiin khan Art & Culture Minister Pu R.Romawia’n Vanapa Hall, Aizawl-ah a hawng. September ni 26-28, 2018 chhunga neih tur he zaipawl inkhawmpuiah hian Mizoram bakah Delhi, Meghalaya, Arunachal Pradesh, Manipur, Nagaland, Tripura leh Assam atangin zaipawl 11 an tel a, an zavaiin zaipawl member artist-te leh anmahni hruaitute nen mi 165 an tel a ni.

‘Swar Sudha’ hawngtu Khuallian Art & Culture Minister Pu R.Romawia chuan Mizoramin rampum huap zaipawl inkhawmpui a thleng thei chu a lawmawm takzet a ni tiin state pawn atanga lo kal zawng zawngte lawmna thu a sawi a. Tunlai khawvelah hnam bil leh chi bing ang zawnga politics leh thildang kalpui tumna boruak a awm laiin hetianga ramchhunga hnam leh tawng chi hrang hmangten zaipawl inkhawmpui hun hlim taka an hman thei hi a vanneihthlak a, hnam inpumkhatna leh inunauna boruak tha a siam chho ngei a beisei thu a sawi bawk. Ramchhung hmun hrang hranga hnam chengte inkara inpawhna leh inrhiatthiamna tha zawk a awm theih nana Sangeet Natak Akademi ten zai leh rimawi hmanga an hmalakate chu Pu R.Romawia chuan fakin, hun lo kal zel turah pawh a duhsakna sang ber a hlan a ni.

Art & Culture Director Pu R.Hmingthanzuala pawhin Choral Festival chhimtu zawng zawngte lawmna thu sawiin he zaipawl inkhawmpui hi nikum 2016 khan dilna an thehlut tawh a, an beisei ang ngeiin sorkar laipuia Ministry of Culture-in rem tih sakin  ram mipuite hriat leh lawm hlawh tak he Choral Festival ‘Swar Sudha’ chu Aizawl, Mizoram ngeiah nghah a ni thei ve ta chu a lawmawm takzet a ni, a ti.

‘SWAR SUDHA - Festival of Choral Music & Instrumental Ensemble’ ah hian heng zaipawlte hi an zai dawn a ni :

Choral Music -

1. KC Lights Choir, Shillong, Meghalaya

2. Swar Trishna, Delhi

3. Sachin Debbarman Memorial Govenrment Music College, Tripura

4. Central YMA Choir, Aizawl, Mizoram

5. Hallel Singers, Kohima, Nagaland

6. Luit Konwar Rudra Barijah State College of Music, Guwahati, Assam

7. Bel Canto Choir, Aizawl, Mizoram

8. Eerik Choir, Shri Shri Balmukund Dev Music College, Imphal, Manipur

9. The Leprosy Mission Choir, Aizawl, Mizoram

Instrumental Ensemble -

1. Karpung Karduk Centre for Folk Performing Arts, Arunachal Pradesh

2. Songs & Drama Unit, Cultural Affairs & Heritage Department, Govt. Of Sikkim, Gangtok