Nimin tlai khan Art & Culture Minister Pu P.C. Zoramsangliana chu Asian Institute of Gaming and Animation (AIGA) Bangalore aiawh pahnih - Pu Hanif Mohammed, Director Corporate Affairs leh Pi P.B. Rosangkimi Regional Coordinator (North East) te chuan Minister hi a chenna inah an hmu a.

Mizo thalai te tan Asian Institute of Gaming and Animation (AIGA) hi tunlaia khawvel leh thalaite zinga lar em em - games chi hrang hrang - online games, mobile games, PC games & Console games siam chhuaka zirna leh animation - film leh video lam zirna hmingthang tak chu Mizo thalai thahnem zawkin an zir theih nana kawng kawhhmuh pahin helama thalai tam zawk Mizoram sawrkarin tir turin an ngen a. Tun dinhmun mai ah chuan sawrkarin a tirh (sponsor) theih loh thu leh mimala zir duhte tan erawh chuan Art & Culture Department leh pawl dang kaltlanga kawng zawnpui leh puih a hnial loh thu in a chhang a ni.

AIGA a Gaming leh Animation zirna hi tunlaia mi ngaihven hlawh leh a zir chhuakte tana eizawnna tling leh tha - ram chhungah leh pawn thleng pawha hna thawh theihna a ni a. AIGA ah hian course chi hnih - kum 1 chhung leh thla 9 chhung zir turte a awm a. Dan tlangpuiin Graduate chin tana zir tura tih a ni a ; thiam thei bik tan chuan 10 +2 pawhin a zir theih a.

Art & Culture Minister hi Pu Ngurbiaka, Director, Pu R. Hmingthanzuala, Dy. Director leh Pu F. Lalthanmawia, Archivist ten an tawiawm a ni.

Hre chiang duh chuan Art & Culture Office-ah zawhfiah theih a ni ang.