Chalfilh Group YMA chuan ni 12-22 March, 2012 chhung khan Khanpui ah Group YMA Conference an nei a, Art & Culture Minister Pu P.C.Zoramsangliana leh Parliamentary Secretary Pu Chawngtinthanga, bialtu MLA ten an hmanpui.
Khanpui Community Hall-a hun hmanah Khuallian Pu P.C. Zoramsangliana chuan thusawiin Darlawn khawdaia MST Bus chetsualna avanga hliam tuar leh chhiat tawkte Chalfilh Group YMA member ten theihtawp chhuaha an lo buaipuina ah Department aiawhin lawmthu a hrilh a, YMA member te chu Mizo hnam nuna mawi tak tlawmngaihna vawng nung zel tura chahin ruihtheih thil laka inthiarfihlim tur leh Mizo incheina te uar deuh deuh turin a fuih bawk.
Chawhnu lama Khuallian Parliamentary Secretary Pu Chawngtinthanga chuan khawvel hmasawnna-in min chim mek lai hian kan hnam nun mawi tak chhawm nung zela, thangthar zelte tana chenna tlak ram nuam siam tura tan la theuh turin thalai kalkhawmte chu a chah bawk.
Chalfilh Group YMA Conference ah hian an Group huam chhunga mi chhuanawm bikte chawimawina hun hman a ni a, Minister leh Parliamentary Secretary te hian heng mite hnenah hian Citation leh pawisa fai an hlan a ni :- 1. Prof. R.Lalthantluanga, Vice Chairman, MZU, Serzawl khawchhuak.
2. Pu Lalsawmliana Sailo, Darlawn Vengpui - Darlawn In kang mahni nunna thapa thelhtute
3. Benjamin Lalhmingsanga, Darlawn Vengpui - Darlawn In kang mahni nunna thapa thelhtute
4. Nl. Lallawmzuali, Khanpui, State Level Nulian Inchai-a pakhatna
5. Tv. Zoramthara Ralte, Darlawn Venghlun, MCS tling thar.
Chalfilh Group YMA Conference ah hian ‘Ram leh hnam humhalh’ tih thupuiah hman a ni a, an Group huam chhungah hian Branch 18 awmin member mipa 3918 leh hmeichhia 2383, a vaiin 6301 an awm a ni.
