836/2024-2025

Champhai, the 15th June, 2024: Art & Culture Minister Pu C. Lalsawivunga hovin vawiin khan 'Ram leh hnam humhalh' tih thupuia hmangin  Vaphai Community Hall-ah YMA Day vawi 89-na ropui taka lawm a ni.

Khuallian Art & Culture Minister Pu C. Lalsawivunga chuan Vaphai khawtlang mipuite YMA Day chibai bukin duhsakna leh hmangaihna nasa tak an lantir thin avangin lawmthu a sawi a. YMA Day puala hun hman chuan aia upa zahna, tlawmngaihna leh midang tana malsawmna ni tura tanlakna thlen se a duh thu a sawi a. Khawtlang mipuite chu zu leh ruihhlo dang laka inthiar fihlim turin a chah a. Khawtlang hmasawn nana lungrual taka tan la zel tur leh sawrkar hmalaknate thahnemmgai taka tawiawm zel turin a fuih a. Mipui leh ram rawngbawl tura thlan tlin a nih theih nana thlawptu a bial mipui leh amah thlawp tlat thintu Vaphai khawtlangte chungah lawmthu a sawi a; ram leh hnam tana rawngbawl kawgah dik leh rinawm taka tawiawm zel turin a sawm nghal bawk.

Art & Culture Minister chuan sawi chhunzawmin, hun reilote chhungin sawrkarin a intiamna hrang hrangte a puitlin tih sawiin, leibate rulh a ni a, pension-te pek niin rei tak lawmman hmu lote pawh pek an ni, a ti a. Sawrkar sum dinhmun a that loh avangin kumin bik chu sum leh pai dinhmun sawhngheh kumah puan a ni tiin, sum leh paite renchem tak chungin anihna tur taka hman a nih phawt chuan sum dinhmun pawhin ziaawm lam a pan zel beisei a ni, a ti a. Khuallian hian Art & Culture Department atanga ruahman Thlangtlak Mual cheithatna tur Rs 3,50,000/- (cheng nuai thum leh sing nga) chu khawtlang hruaitute kutah a hlan nghal bawk. 

He hun hi Tv. Lalhunmawia, Vice President, Vaphai Branch YMA chuan kaihhruaiin Pu C. Zakanglova, Branch Adviser-in inlawmna thu a sawi a. Tv. Lalruatfela, Secretary, Vaphai Branch YMA hnen atangin report ngaihthlak a ni a. Member boralte sunna hun leh hruaitu hlui ngaihhruina hun hman niin thuthlung sawirual a ni bawk a. Pu Zadingpuia, Vaphai Branch YMA President, Pu T. Thanglura, Treasurer, Tuipuiral Group YMA, Pu Lalchhuanawma, Treasurer, Sub-Hqrs. YMA Champhai leh CNO hruaitu Pu Peter Thang, Vaphai Insuihkhawm Pawl (VIP), Champhai President Pu C. Keiliana leh Vaphai Insuihkhawm Pawl Aizawl Treasurer Pu C. Thasiama te hnen atangin thusawi ngaihthlak a ni a. Bialtu MLA Pu Ramthanmawia chawimawina hun hman niin YMA Day puala a thuchah chhiarchhuah a ni bawk. 

He hunah hian Vaphai khawtlang buatsaihin Khuallian Art & Culture Minister Pu C. Lalsawivunga, Vaphai Branch YMA President hlui chawimawina hman a ni a. Hnam lam leh zai benglut tak takte thlira ngaihthlak a ni. Tlaiah YMA Day pual ruai kilho a ni. 

Vaphai Branch YMA hi Section 4, Fiara, Thasiama, Maurawkela leh Chawngtinleri section-ahte then niin tun dinhmunah hian member 1026 an awm mek a. YMA Day lawmna programme hi June ni 13, 2024 atang khan tan niin, thingphun hnatlang, hnam lam leh Mizo infiamna hmangtein intihsiakna neih a ni tawh a. Zanin hian lengkhawm zai, solo leh debate hmangtein intihsiakna neih a ni leh dawn a; result puan leh YMA Day 2024 kharna hun hman a ni ang. 

Minister Pu C. Lalsawivunga chuan tukin khan Vaphai khawtlang hmalaknaa C.Lalsawivunga Park, Vaphai Tlangzawla buatsaih chu hawngin thing tiak a phun a. Hemi hnu hian AH& Vety. Department hmunhma, Disease Surveillance Office cum Veterinary Dispensary tlawhin a enfiah bawk. 

Pu C. Lalsawivunga hi Dr. B. Lallawmsanga, DAH&VO, Dr. Robert Rualthankhuma, Dy. Director (Planning), Pu N. Lalzarzova, BDO Khawbung, Dr. Lallawmkima, DIPRO leh Pu Vanlalhuma Singson, Archaeologist, Art & Culture Department te'n an tawiawm a ni.