Vawiin chhun dar 12.00 khan Art & Culture Minister Pu P.C. Zoram Sangliana hovin a pisaah Chapchar Kut Organising Committee – 2013 chu an thukhawm a; 28th Feb leh 1st March, 2013-a Chapchar Kut hman zawh tak thlirletna hun an hmang.
Pu P.C. Zoram Sangliana chuan Chapchar Kut 2013 tluang taka Aizawl leh district khawpui leh khawpui dangah te tluang taka hman a nih avangin a huaihawttute chungah leh Kut hlutsaktu mipuite chungah lawmthu a sawi a. Tun hnaia Chapchar Kut uar taka kan hmang thin leh kan sakhuana nena inkungkaih thei tura programme kan duang chho zel chuan Mizo mipuite thinlungah mahni hnam ziarang leh incheina ngaihhlutna thinlung a pawchhuak thar mek a ni, Art & Culture Minister chuan a ti.
Organising Committee member-te chuan kum dang zawng aia mipuiin Chapchar Kut an hlut chu lawmawm an tih thu an sawi a. Mipui pawngkhawmten harsatna leh buaina siam lova mahni inthunun tak chunga Kut an chhim thei chu fakawm an tih thu an sawi lang bawk. Organising Committee chuan hun local lehzel turah pawh Mizo-te Kutpui chuan a hmanna hmun atan hmun lailum tha chang chhunzawm zel tura an duh thu an sawi a. Chapchar Kut 2013 a hlawhtlin theihna tura theihtawp chhuahtu –Central YMA leh YMA Branch hrang hrang te, Cultural Organisations te, lemziak leh thlalak exhibition te, pangpar show leh handloom exhibition hlawhtling taka entir a nih theihna tura association-te inpekna achungah pawh Organising Committee chuan lawmthu a sawi a. Sawrkar department hrang hranga mawhphurhna neiten an chanvo tha taka an hlenchhuah avang pawhin Organising Committee chuan lawmthu a sawi a ni. District khawpuia Chapchar Kut-2013 hmanna tura sum ruahman a tlem deuh tih chungchang pawh Organising Committee chuan an sawiho a; hei hi chhinchhiah a nih rualin, tunhma zawng aiin Mizoram mipuiten Chapchar Kut kan hlutsak tawhzia a tarlang nia hriain lungawi lohna lawmawm lam niin a ngai a ni.
Chapchar Kut hi Mizote Kut hlimawm leh ropui ber anih angin kumtin hman chhoh zel tum a ni a. A hman dan leh item chungchangah te rawtna nei duhte tan Art & Culture Department hnenah englai pawha thlen theih a ni tih Organising Committee chuan an sawi bawk.
