Vawiin chawhna dar 10:30 khan Pu P.C. Zoram Sangliana, Art & Culture Minister chuan Champhaiah District Library building thar a hawng.

Hawnna thu sawiin, Minister chuan Art & Culture Department in unaute anga a lo en thin YMA, MHIP, MUP hruaitu hmelte leh sorkar official te hmel a hmuh avanga lawmthu sawiin building changtlung tak Champhaiin Library atana an nei thei chu lawmpuina hlanin hetiang taka thaa an sa thei chu a satu department chungah pawh lawmthu a hrilh nghal a, Art & Culture department chu a thawktu officer atanga peon thlenga mahni inpezo leh neitu rilru pu an nih avanga budget tlemte ni chunga anmahni thawh nasat avanga Cheraw Kan ah te World Record thleng thei an nih thu leh Mizoram chhunga khaw hrang hranga Library changtlung tak tak hung thei an ni tiin chhuanawm a tih thu a sawi.

Champhai District hi Mizoram a Pipu te sulhnu pawimawh tak tak awmna anih avangin ‘Cultural Capital of Mizoram’ a nih theihna tur tam tak a awm a ni, tiin Art & Culture Minister Pu Zoram Sangliana chuan Thasiama Seno neihna hmun te, Khawbunga Hla Kungpui Mual te, Lamsial Puk te, Hringlang Tlang te leh a piah lawka Dil hmingthang em em Rih Dil te leh hmun hmingthang tam takte hi an nihna bo chuang si lova, enkawl zui that nise a duh thu sawiin a thlalak leh a lem Calendar ah te tar duhtawk mai lova a enkawl zui na kawnga mawhphurhna kengkawh theuh turin Champhai mipuite a ngen a. Chumi atan chuan Champhaia officer leh mi thiamte chuan a project leh technical works etc. te lo buaipui a, Mizoram Monuments ti changkang tura hmala turin a sawm a. Hemi atan hian Minister a nihna anga hma lo lak pui pawh a in huam thu a sawi a ni.

Hmasawnna eng ang pawh awm se kan Mizo-na hi dal miah lo se, Kalvari Culture in min tuam se, tiin Pu Zoram Sangliana chuan Library chu lo hmang tangkai tur leh lehkhabu te lo chhiar a, vawngtha tura chahin ti changtlung tur lehkhabu te pawh rawn ngaihtuah pui zel a tum thu a sawi a. JNNURM atangin Champhai tan Town Bus pakhat pek a ni dawn tih sawiin Cheraw Kana World Record kan siam chu kumin 2012 Guiness World Record ah a lang dawn a ni, a ti bawk. A ngenna ngaipawimawh a Champhai Government College zirlai a bikin hmeichhia ten kar khata nilaini apianga puan an bih thin chu lawmawm a tih thu a sawi bawk.

Champhai District Bawrhsap Pu Vijay Kumar Bidhuri pawhin thusawiin Minister in Town Bus pakhat a pek leh Library building changtlung tak hawn a nihna ah lawmthu a sawi a. Pu Zothanglawra, District Librarian chuan technical report pein he Library Building hmun hi Revenue Department hmun anih thu sawiin, DC Office Keifangtlanga sawn a nih khan Library hmun atan Revenue hotute nen inbiain he office hmun hi Library hmun atan PWD assessment siam zul zuiin Rs. 11,00,000 (nuai sawm pakhat) in an lei thu leh a ram leina leh building sakna atana senso zawng zawng chu Rs. 31,15,524.00 (cheng nuai sawmthum pakhat singkhat sangnga zanga sawm hnih pali) a nih thu a sawi.

Library sakna sum/pawisa zawng zawng hi Raja Ram Mohan Roy Library Foundation, Kolkata hnen atanga dawn vek a ni. He building hi Mizopa chhiara chhawng thum niin chhawnghnuai ber store room, a lai peon quarter leh main building te an ni. A building len zawng chu - A dung 53 feet leh a vang 47 feet a ni.

He hawnna inkhawm kaihruaitu Pu Ngurbiaka, Director, Art & Culture Department chuan Library lehkhabu te hi computerized tum mek a ni a, State Library atangin District ah t pawh la tih zel tum a nih thu sawiin Website ah te pawh dah tum anih thu a sawi. Pu Lalramliana, State Librarian chuan kalkhawmte hnenah lawmthu a sawi a ni.

Minister hian vawiin chawhnu lam khan Champhai chhuahsanin Khawzawlah hun hmang lehin Aizawl a haw tlang nghal ang.