Information & Public Relations Department leh Mizoram Art Development Society te tangkawpin an buatsaih ‘Art Workshop, 2017’ chu vawiin khan I & PR Director Pi Lalnithangi’n Archive Hall, Babutlang-ah a hawng.

Hawnna thu sawiin Pi Lalnithangi chuan Artist te hian thiamna ril tak hmangin hlimthla mawi leh ngaihtuahna tithui thei tak tak an pho chhuak thin a. Mite thinlungah thil mawi leh tha ngaihsanna te painting leh lemziak ngainatna te a intuh hle tawh a. MADS member ten thahnemngai tak leh nuam ti taka in lemziakte mipui hmuh theiha in pho chhuak thin hian mite rilruah thu a sawi nasa thei hle a ni, a ti. Arts Workshop, 2017 chu member ten hlawk taka hmang turin duhsakna a hlan a ni.

He huna Khualzahawm Pi Lallianpuii, Joint Director, I & PR chuan Painting leh lemker chu mibik ten thiamthil hmanga eizawnna tha tak an kalpui anih avangin a zahawm hle a ni, a ti a. Damlai leh thih hnu thleng pawha hming chuai ngailo tura siamtu anih avangin thuk lehzuala inzir turin a chah a. Visual Arts hmanga a tuimite chawikan zel hi sawrkar thiltum a ni, a ti a ni.

Pu HK Jerry Ramliana, President, MADS in workshop hawnna hi a kaihruai a, Pu Laltanpuia, Vice President, MADS leh Pu V. Lalzawmliana, Gen. Secretary, MADS ten thu an sawi bawk.

Arts Workshop hian November ni 17, 2017 thleng a awh dawn a. Mimal leh pawl a duh apiang te tan nitin tlawh theih a ni dawn a. Tel tuma inziak lut artist 40 ten a hmunah painting hna nitin an kalpui ang.

Mizoram-ah hian lemziak thiam, painters leh scluptors te hian hma an sawn nasa hle a. Eizawn nana hmang pawh an thahnem tawh hle a ni. Governor chenna Raj Bhavan ah pawh artist te kutchhuak hi hmuh tur a awm nual a, Dandi March Pu HK Jerry Ramliana ziah mawi tak chu Raj Bhavan chhungah hun a ni. 

Art Gallery hmun 4-ah hawn a ni tawh a, chungte chu -

1. Aizawl Art Gallery, MUP Building, Khatla

2. S & S Art Gallery, Zarkawt

3. Art Novelty, Chaltlang leh

4. Jerry Arts, Chanmari te an ni a, heng hmuna paintings pho chhuahte hian nitin tlawhtu leh leitu an nei a, khualtha rampawn atanga lo zin ten an hlut thei hle a ni.