Vawiin khan Aizawl West College Auditorium-ah National Health Mission hnuaia ASHA Coordinators mi 9 leh ASHA Mobilizers mi 109 te pualin intuaitharna Refresher Training ni hnih awh tur tan a ni a. NHM Director, Dr. Lalrozama, IAS chu khuallian niin a hmanpui.

Khuallian chuan ASHA Coordinator, ASHA Mobilizerte leh ASHA te thawhhona chu kal kawp tlat tur leh then hran theih loh a nih thu sawiin vantlang hriselna kawnga hna tantute an nih dan a sawi a. Tha taka mahni chanpualte hlen chhuak thin turin a fuih a. Report fel tawklo awm thin hian phai lama kan dinhmun a tichhe thin a, hei vang hian funding thlengin harsatna kan tawh phah thin a, kan report felfai taka siam hi kan tih tur a ni, a ti.

Mizoramah hian ASHA Mobilizers mi 109 awmin mobilizer pakhat zelin ASHA 10-15 vel an enkawl tlangpui thin a. ASHA Mobilizer te hian ASHA hnathawh leh incentives enfiahin an hriattturte an hrilh chhawng thin a. ASHA awmna khuate an vil reng a ni. Quarterly ASHA Functionality Report te buaipuiin Village Health Sanitation & Nutrition Committee member an ni bawk. District Cordinator-te hi district tinah pakhat theuh awmin ASHA incentive buaipui hi an hna ber a ni.

NHM Community Process, State Nodal Officer Dr. R. Lalchhuanawma chuan training hi a kaihruai a. State ASHA trainers ten ASHA mobilize function, nau nei tura inbuatsaihna, nutrition, malnutrition leh thupui pawimawh dang hmangin zirtirna an pe bawk.