Ni 15-16 July, 2011 chhunga Asian Karate Federation (AKF) huaihawta China-a 11th Asian Cadet & Junior Karate Championship 2011 neihna tura India aiawh tur thlanna ni 28.5.2011-a New Delhi-a All India Karate-Do Federeation (AIKF) buatsaihah All Mizoram Karate Association (AMKA) chuan Mizo rawlthar 3 - J.Vanlalenkawla S/o J.Lalroliana, College Veng, Saiha, Vanlalthanpuia S/o T.C.Lalremsiama, Chanmari West, Aizawl leh SAI naupang Khansianmunga S/o Khuplianthanga, Champhai Vengthar te chu a tir liam a. Khansianmunga hi semi-final-ah vanduaiin, J.Vanlalenkawla hian final-ah a khingpui 1-0 a hneh lovin below 61 Kgs-ah India Team-a Reserve Player atan thlan a ni a; an zinga pakhat Vanlalthanpuia chu final-ah chakna changin, Junior below 55 Kgs-ah India aiawh tura thlan a ni ta a ni. Mizoram Karate Team Coach Pu C.Dosavunga hnen atanga thu dawn danin, "Heng Mizo rawlthar rual 3-te hian an khel tha hlawm hle a; tuntuma India aiawh tura an nau tling ta Vanlalthanpuia pawh hi phai lam hotute pawhin China-a fehchhuah hun atan pawh beiseina sang tak an neih zinga pakhat a ni nghe nghe a ni," a ti. Pu C.Dosavunga leh a hote hi ni 1.6.2011 hian Kolkata atangin Mizoramah an lo thlawk haw ang.

Vanlalthanpuia hi Pu T.C.Lalremsiama leh Pi C.Vanlalnunpuii te fa mipa hlir 5 zinga a upa ber niin Aizawl Chanmari West-ah an chhungkuain an khawsa a. Tunah hian Gov't. Chaltlang HSS, Aizawlah Class-XII a zir mek a, kum 2009 khan Karate-a amah zirtirtu Pu C.Dosavunga hnen atangin Black Belt 1st Dan Degree a lo dawng tawh a; an unau zinga naupang ber tih loh a nau mi 3 dangte pawh Black Belt 1st Dan an ni ve tawh hlawm nghe nghe bawk. Vanlalthanpuia hian Karate intihsiakna hrang hrangah hnuhma a lo nei ve nual tawh a; Mizoram State Level Championship-ah Gold Medal 25 vel zet la tawhin, Mizoram tan pawh North-East Games-ah Silver Medal 2 leh Bronze Medal 3 bakah, National Level-ah Gold Medal 3 leh Silver Medal 1 a lo hlawhchhuak ve tawh a. Chubakah, National Coach te bakah Italy, Iran leh Dubai Coach tha tak tak te hnen atangin Karate Training pawh a lo dawng ve tawh thin nghe nghe bawk a ni.

All Mizoram Karate Association (AMKA), General Headquarters President Pu R.Zomawia chuan, an nau Vanlalthanpuia'n India aiawha China-a 11th Asian Cadet & Junior Karate Championship a hmachhawnna turah hian, AMKA Technical Board hnuaiah uluk takin Preparatory Training a nei hmasa ang a; China ram luhchhuah dawn hnaihah chawlhkar 2 vel chhung Federation kaihhruainain National Coach ten an hrual zui dawn bawk a ni tih a sawi a. Sum leh pai senso tur zawng zawng pawh Mizoram sawrkar an rinchhan thu leh, Mizoram State Sports Council hotute hnenah beiseina an nghah thu sawiin, kan Sports hotute bakah kan Sports Minister zahawm tak pawhin National leh International/World level lama hnuhma leh hlawhtlinna neih chhoh hi an thupui a nih avangin, AMKA pawhin hei hi ngai pawimawhin theihtawp kan chhuah chho zel a ni a ti a. Tuna an player Vanlalthanpuia sikul kalna Govt. Chaltlang HSS Principal leh an zirtirtute hnenah pawh, an zirlai tana hetiang tih theihna hun an lo pek theih thin avanga lawmawm an tih thu te sawiin, kal zelna turah pawh thawhhona tha tak an neih zel a beisei thu a sawi bawk.