Asian Development Bank kaltlanga hmasawnna ruhrel hnathawh dan tur ngaihtuahtu committee 15th State Steering Committee (SSC) of North Eastern Region Capital Cities Development Investment Programme (NERCCDIP) chu Pu Lalmalsawma, IAS Chief Secretary hovin vawiin 21st September, 2015 - 1:00pm khan Chief Secretary Conference Hall-ah an thukhawm.

Meeting chairman Pu Lalmalsawma chuan Asian Development Bank kaltlanga hnathawh hi Mizoram tan, a bik takin Aizawl khawpui tan a pawimawh hle a, Sorkar department hrang hrangte thawhhona tha neih a pawimawh hle thu a sawi a ni. Chairman sawm angin SIPMIU Project Program Director Pu Valbuanga'n presentation pein Project hrang hrang hnuaia hmalakna awm tawhte member-te hrilhfiahin power point presentation a nei a. ADB hnuaia hmasawnna hna thawh mek hi thuang thumah Tranche I, Tranche II leh Tranche III-ah te then a ni a. Project 1 (Tranche I) chu thawh zawh tawh niin water reservoir 7, water meter 20000 Nos. leh tui tihthianghlimna chlorinator Tuikhuahtlanga PHE tuikhuahah leh Chanmari-a PHE tuikhuahah te dah a ni. Tanche I project hi zawh tawh niin close tawh a ni nghe nghe.

Project Director Er. Valbuanga chuan Tranche II (Project 2)-ah hian Water Supply, Sewerage & Sanitation leh Solid Waste Management-a hnathawh mek leh thawh zawh tawh te Steering Committee member te chu a hrilhfiah nghal bawk a, work schedule anga tluang taka thawh a nih chuan 30th June, 2018-ah thawh zawh hman tura ruahman a nih thu a sawi.

Tranche III hna thawh tan a nih hma hian pre-loan negotiation Asia Development Bank hotute nen September thla vek hian neih a ni tawh a. Chumi chhunzawmna leh project component te tihchianna tur National Steering Committee chu 24th September, 2015-ah New Delhi-ah meeting neih leh tur a ni. Tranche III hnuaia hnathawh turah hian tui sem (water supply), bawlhlawh sawngbawl (solid waste management) leh in leh a chheh vela bawlhhlawh thlì (sewerage) sawngbawl dan turte a tel a ni.

Mizoram Sorkarin SIPMIU kaltlanga ADB funded project a thawhnaah North East State zingah Tripura State nen Tranch I leh tranche II project-ah an tihthat ber avangin Mizoram leh Tripura state te chauh hi Tranche III project chhunzawm phal an ni nghe nghe. Tin, Mizoram state bik hi ADB project latu zingah North East State-ah a titha ber a ni bawk.

Asian Development Bank kaltlanga loan lak hi Mizoram Sorkar loan lak a ni lo a, Govt of India-in Asian Development Bank atanga la-in chu pawisa chu North East state hrang hrangte hian hmasawnna hnathawh nan an hmang a ni. He meeting-ah hian Dr C. Vanlalramsanga, Secretary, UD&PA Deptt; Er R. Lalfanliana, Engineer-in-Chief PHE; Pu K. Lalropara, Addl Secretary, Finance Department; Pu Saihlira, Dy Adviser, Planning; Er Bowman, SE, PWD leh officer dangte an tel.