Kum dang ang bawkin 23 Sector Assam Rifles, Mizoram chuan Mizo zirlaite tan National Integration Tour an buatsaih leh a. South India fanga he National Integration Tour-a kal tur Mizoram district hrang hrang atanga zirlai titha zual thlan khawm mi 30 te chu vawiin khan AR Ground, Aizawl atangin Mizoram Governor Lt.Gen.M.M.Lakhera’n a vailiam. He National Integration Tour hi 23 Sector hnuaia Serchhip-a awm 4 Assam Rifles ten an hruai dawn a ni.

 

 

Governor chuan Mizo zirlai engemaw zat Mizoram state pawna la zin ngai lote tan Assam Rifles-in hetiang Tour an buatsaih thin chu a lawmawm hle a ni, a ti. India chu ram zau tak hnam leh sakhua hrang hrang awmna a ni a, kan inkara inhriathiamna leh inunauna chhawm nung tur chuan intlawhpawh tam a tul a. Vawiina National Integration Tour-a chhuak tur zirlaite chu an tlawhna state apiangah zir tur tam tak an neih ngei a rin thu leh Mizoram palai an ni tih hre renga an tawngkam leh chetziaah Mizoram tihmingtha turin a chah a ni.

23 Sector Assam Rifles DIG Brig. S.K.Verma pawhin thu sawiin Mizo zirlai ten India ram hmasawnna leh culture hausakna an mit ngeia an hmuh chuan anmahniah tumruhna lian tak a pian tir a beisei thu a sawi a. State hrang hrang an tlawhnaah hmun hminthang tak tak bakah mi pawimawhte nen inkawmna hun siamsak a ni dawn tih a sawi bawk.

National Integration Tour-a kal zirlai 30 te hian India chhimlam hmunpui hrang hrang an tlawh tur zingah IT City (Bengaluru), Mysore Palace, Vivekananda Rock (Kanyakumari), Officers’ Training Academy (Chennai), Air Force Academy (Bengaluru), Kerala, Bay of Bengal, Indian Ocean, Arabian Sea te a tel a. Karnataka Governor leh Kerala Chief Minister te nen inkawmna hun tha tak neih beisei a ni bawk. Heng zirlaite hi February ni 6/7 ah Aizawl-ah an rawn let leh beisei a ni.