23 Sector Assam Rifles hnuaia 46 Assam Rifles chuan vawiin khan  a hmasa ber atan ‘NGOs Conclave 2018’  a buatsaih a; Central Young Mizo Association, Mizo Zirlai Pawl leh Mizoram Football Association - te chu he Conclave-ah telin Mizoram hmun hrang hranga Assam Rifles awmte nena thawhhona tha zawk nei dan tur an sawiho.

Vawiina Conclave neih takah hian Pu Vanlalruata, President CYMA; Pu Ricky Lalbiakmama, Financial Secretary, NESO, MZP leh Pu Tuikhuahthanga, Treasurer, MFA ten thu sawiin Mizo mipuite tan Assam Rifles hmalakna hrang hrang chungah lawmthu an sawi a, a bik takin Mizo thalaite hmakhua an ngaihna thin chu lawmawm hle a ni, an ti. Commandant, 46 Assam Rifles chuan Mizorama Assam Rifles awm tirh atanga Mizo mipuite nena an inlaichinna leh thawhhona thin hrang hrang tarlangin ‘Tlang Mite Thian’ an nihna chu kalpui zel an tum thu a sawi.

Vawiin vek khan Assam Rifles buatsaih ‘Ride for Unity - Sentinels Cycle Rally’ chu Brig.M.S.Mokha, SM, DIG 23 Sector Assam Rifles-in AR Ground atangin a vailiam a. He Rally-a telte chu Aizawl-  Srikona, Cachar thleng an kal dawn a. ‘Ride for Unity’ in a tum ber chu Mizoram leh Cachar inkara  hnam inpumkhatna thehdarh leh hriselna lama mipuite zirtir a ni. Rally-a tel mi 10 te chu Capt Joy Sarkar-in a kaihruai a; ni 3 chhungin km 200 an tlan ang a, Kawnpui, Kolasib & Vairengte khuate an tlan tlang dawn a ni. ‘Ride for Untiy’ hi an tlan tluan zel chuan January ni 13, 2018-ah Srikona, Cachar-ah Lt.Gen.Shokin Chauhan, AVSM, YSM, SM, VSM, DG Assam Rifles-in a lo lawm lut dawn a ni.