4112/2023-2024

Aizawl, 11.03.2024: Minister Dr. Vanlalthlana, School Education Department, Higher & Technical Education Department, etc. changtu chuan vawiin khan Assembly House ah HSLC Examination 2024 a suggestion in pek leh exam zawhna chungchangah a hnuai ami ang hian thu a sawi:

Kumin 2024 MBSE hnuaia Board exam kaihhnawihah subject pakhata suggestion leh exam zawhna inang tam lutuk avanga statement siam a ngai ta hi School Education Department leh Mizoram Board of School Education (MBSE) chuan pawi kan ti tak zet a ni.

MBSE hian Board examte hi a ngai pawimawhin, kum tam tak tawnhriat atangin, fimkhur takin exam hi a buatsaih thin a. Printing press aṭanga zawhna siam sa put ru a awm lohna turin, State Board dangte pawhin an tih ve ṭheuh angin, Mizoram pawnah a chhut hna hi thawh ṭhin a ni a. Mizoram chhunga Exam Centre hrang hrangah him taka a thlen theih nan District headquarters tinah MBSE officer-te ngeiin an sem darh a. District headquarters ṭheuh aṭangin Centre Superintendent-ten anmahni ngeiin an lam a, an khua ṭheuh police out-post-ah emaw police duty awmna hmunah emaw him takin exam chhung zawng vawn ṭhin a ni. Centre Superintendent-te hi ziaka inkaihhruaina dan pek an nih bakah uluk taka hrilh fiah ṭhin an ni bawk.

Exam chhanna lehkha phek (answer sheet) zawng zawng hi number lem (code) pek vek a nih hnuah exam chhanna endiktu (examiner) hnenah tu chhanna nge tih hriat theih loh turin pek chhuah a ni a. Exam chhanna endiktu (examiner)-in an en zawhah exam chhanna ennawntu (scrutinizer) kutah a lut leh a, chumi hnuah pawh en nawn leh a ni ṭhin. Result peih fel hnu-ah pawh, fimkhur thu hlaah, naupang ti ṭha zual eng emaw zatte chhanna chu zirtirtu thlan bikte en nawntir leh ṭhin a ni.

Board exam atana zawhna siam (question paper setting) leh en dika, lo thlitfim (moderate) kawngah MBSE hi a fimkhur em em a. Principal emaw Headmaster te (head of institution) hnen aṭangin zirtirtu thawk rei tawh, rin tlak leh hming ṭhate la khawmin mawhphurhna la thei tur zirtirtu hming a chhawp chhuak a. An zing aṭang hian zawhna siamtu tur leh en dika lo thli fimtu tur te chu a thlang chhuak leh ṭhin. Ruat an nihna lehkha-ah (appointment letter) pawh an hna chu thuruk vawn ngai thil a nih thu leh dan an bawhchhiata hrem an nih theih dan thlengin tar lan ṭhin a ni a. Kaihhruaina dan ziaka pek vek ṭhin an nih bakah moderator te hian hmingziak (signature) pe thlapin dan zawm tura intiamkamna an nei leh ṭhin a ni.

Zawhna thlifima en diktu (Moderator) te hian MBSE Office-ah ngei an hna hi an thawk ṭhin a, pindan hran bik siamsak an ni. Ziaka inkaihhruaina pek an nih bakah mimala hrilh fiah an ni bawk a. Chumi hnuah chauh chuan an hna hi an thawk tan thin.

An thawh chhung zawngin MBSE officer-in an vil chawt a, an hnathawhna lehkhate hi ni tin hna an thawh ṭan dawnin Controller of Examinations hnen aṭanga pek chhuah ṭhin niin tlaiah lak khawm leh ziah ṭhin a ni. An hnathawhna kaihhnawih thil eng mah lak chhuah/hawn phal a ni lo a. An ziah chhinna (rough sheet) zawng zawng pawh bawlhhlawh bawma paih phal a ni lo a, an hnathawhna lehkha zingah thil tel vek ṭhin a niin result chhuah aṭanga thla thum hnuah tih ral a ni chauh ṭhin.

Heti khawpa MBSE a fimkhur chung pawha zawhna thlifimtute zinga miin exam atana hman tura zawhna an theh luh chu a zirlaite hnena suggestion atana a lo hmang ta mai hi a pawi kan ti tak zet a. Sorkar hnathawk inkaihhruaina dan kalh tlat a nih bakah na taka hrem theihna a ni.

March ni 8, 2024 tlaiah HSLC exam-a Social Science subject-ah, Board exam-a zawhna lo chhuak thei awmte rinlawkna (suggestion) ang chauh ni si, Board exam zawhna nena inang deuh vek chu Govt. Mizo High School zirtirtu pakhatin a zirlaite hnenah a pek thu social media-ah a darh tih hriat a nih veleh MBSE hotuten hma an la nghal a. He thil hi Govt. Mizo High School zirlai pakhat hnen atangin a chhuak tih hriat a nih hnuah MBSE chuan MISSTA President, Govt. Mizo High School Headmaster leh zirtirtu inhnamhnawih nia rin chu ko nghalin, thu zawhfiah an ni a. Zirlai naupangte pawh thu zawh fiah leh niin Govt. Mizo High School zirtirtu hian suggestion chu a lo pe ngei a ni tih finfiah a ni ta a. He zirtirtu hian naupang zirnaa chak lo bik deuh thenkhat, a hrana zirtirna (special class) neihpuiin, suggestion darh chhuak ta hi pein, zirlaite hian an lo ziak thla hlawm a. Zirlai ten an lehkhabu/rough book-a suggestion an lo ziah thlak pawh evidence atan kawl that a ni.

Social Science subject suggestion darh chiama lang hi uluk taka chhui a nih hnuah nasa taka darh a ni lo hlauh tih hriat a ni a. A chhuahna school naupang pawhin an nei vek lo tih kan hria a. Zirlai thenkhat, special class kal tura tih hi an kal vek lo va, a kalte pawh hian an lo ziak thla vek lem lo tih te pawh hriat a ni ta zel a ni.

He thil thleng ngaihtuah hian Minister hovin 9.3.2024 (Inrinni) leh 10.3.2024 (Pathianni) khan emergency meeting nei tawhin, sawrkar chuan a ngai pawimawhin zia lo a ti tak zet a. Vawiinah Examination Committee an thukhawm nghal dawn a, hemi paper bika hma lak chhunzawm dan tur an ngaihtuah ang. MBSE hnuaia Class X Exam hi chu routine pangngai angin a la kal chhunzawm dawn a ni.

Hetiang thil dik lo lakah hian sorkar thikthu a chhe thin hle a. Tun hnai mai, kum 2021 pawh khan hei aia buaina te zawkah pawh a mawhphurtu zirtirtu chu suspend a lo ni tawhin a chungah action lak a ni. Dikhlel taka Social Science subject a suggestion petu zirtirtu hian sawrkar hnathawk a nih anga sawrkar dan a zawm loh avangin a chungah action lak nghal a ni a. Ni 10.3.2024 khan CCS (Classification, Control and Appeal) Rules, 1965 hmangin a hna atanga chawlh lailawk tir (suspend) nghal a ni a. Hemi ni vek hian MBSE lam pawhin Police Station ah FIR an theh lut nghal a ni. School Education Department lamin Disciplinary Proceedings pawh a la chhunzawm ang.

He thil thleng hi a pawi kan ti tak zet a. Suggestion petu ngei pawh hian hetianga boruak awm leh mite ngaihven a ni dawn tih hria se la chuan a tih kan ring hauh lo. Zirlai naupang suggestion lo dawngtute hi kan dem lo a, chhui zuia um zui zel pawh kan tum lo. Zirtirtu sang chuang karah zirlaite hnena zawhna lo sawi chhuaktu mi pakhat hian zirtirtu dangte nihna a tarlang lo tih hi mipui ten min lo hriat sak turin ka ngen tak meuh a. Hetianga zirtirtute zahawmna tihmelhemtu lakah hian dan ang taka hma lak kan tum a, hun dangah pawh khauh takin hma kan la zel ang.

A zirtirtu pui, rilru na tak tak an awm tih kan hria a, kan khawngaih tak zet a ni. Kan zirtirtute hi kan la ring zo tawk a, kum danga board examah pawh kan ring chhunzawm zel dawn tih he house zahawm tak hi ka hriattir a ni.

Kumin MBSE hnuaia board exam zawhna chungchanga hriatthiam loh nei zirtirtute leh nu leh pa te an awm nual avangin he hun hi remchangah lak ka duh a.

Mizo zirlaiten National Achievement Survey (NAS) 2017-a ram pum chawh rual kan phak loh avang te leh ram pum huap exam dang JEE leh NEET-a kan tih ṭhat tawk loh avangte’n Mizoram Board of School Education (MBSE) chuan Exam kal phung tlemin her danglam ṭulin a hria a. Tun hmaa ‘Knowledge, Understanding and Application’ ti-a kan hriat ṭhin bakah khan Higher Order Thinking Skills (HOTS) hmanga zawhna kalphung ‘Scheme of Examination and Question Design’ chu kum 2019-2020 academic session aṭanga hman ṭan turin MBSE chuan a siam a.

He HOTS zawhna hian a tum ber chu zirlai naupangten an zirlai vawng (bye-heart) ngawt lo a, an hriatthiam leh hriatthiam loh dan teh chhuah tum a ni a. Hetianga thil thar hman a nih dawn avang hian MBSE chuan HOTS zawhna chungchang inzirtirna training hi district hrang hrang 11-ah 13th August, 2019 aṭanga 22nd November, 2019 thleng MBSE hnuaia affiliated leh non-affliated school zawng zawngte tan a buatsaih a. Training hi avaiin vawi 23 lai neih a ni tawh a. Kum 2020 exam aṭangin subject tinah telh ṭan a ni a, a subject azirin zawhna pumpui atangin 10%-30% vel zel telh thin a ni.

National Education Policy (NEP-2020) pawhin zirlaiten an zirlai hre ringawt lova subject bulthum mantir leh chik taka ngaihtuahna hman thiamtir a ngai pawimawh em em a, chumi pawchhuak thei zawhna siam chu a ngai pawimawh hle. MBSE chuan HOTS zawhna chungchangah training a buatsaih tawh nachungin, intuaithar leh nan ‘Training on Capacity Building of Teachers in Setting HOTS Question’ tih thupui hmangin district zawng zawnga MBSE hnuaia inziak lut leh inziak lut lo school-te tan training a buatsaih leh a. He training hian ni 18thApril, 2023 aṭanga ni 18th May, 2023 thleng a awh a ni.

HOTS hmanga zawhna siam hi tun hnaia kalpui thar a ni mai lo va. Kum 2020 aṭangin subject tinah telh ṭanin kum tin tih chhoh zel a ni a. Tar lan tawh angin hei hi zirlai naupangten an thil zir an man nan leh chik taka an ngaihtuahna an hman thiam nana duan a ni a, kalpui zel tum a ni. Kum hmasa lama zawhna chhuak leh chhuak lo atanga inbuatsaihin awmzia a nei tawh dawn lo va, zirlai an hriatthiam dan endik a ni chhunzawm zel ang. Hei hian kan zirlaite quality a siam thain, state dangte nena khaikhin pawha zirna lama tehnaah a sang zawnga min kalpui zel kan beisei tlat a ni.