Vawiin a Mizoram State Legislative Assembly thukhawm chuan Bill pawimawh tak tak pali lungrual takin a pawm.

UD&PA Minister Pu Zodintluanga put luh "The Mizoram Municipalities (Amendment) Bill, 2010" chu uluk taka sawiho anih hnuah lungrual takin House chuan a pawmpui a, He Amendment Bill hian The Mizoram Municipalities Act, 2007 Section 26(1) Municipal Area puan anih atanga kum khat aia tlai lovah Municipal Councillor thlan tur tih chu "kum khat leh a chanve aia tlai lovah Municipal Councillor thlan tur" tiin a thlak a, Section 34 dah luh turin "Municipal Councillor atana in candidate  tur chu kum 25 aia naupang lo ni rawh se" tih chu pawm a ni bawk.
Finance Minister, Chief Minister ni bawk Bill put luh "The Mizoram Money Lenders and Accredited Loan Providers (Regulation) Bill, 2010" chu uluk taka sawiho anih hnuin lungrual taka pawm a ni. He Bill-ah hian Mizoram chhunga Sawrkar hriatpuina lova sum a pung awma puk tir thin tute khuahkhirh dan tur leh heng mite laka mipuite himna tur dan a awm bakah, he dan bawhchhetute hremna tur dan te pawh a awm a ni.

Cooperation Minister Pu J.H.Rothuama Bill put luh "The Mizoram Cooperative Society (Amendment) Bill, 2010 chu sawiho anih hnuah lungrual taka pawm a ni a, he Bill-ah hian Cooperative Society te chak zawk a kalpui anih theihna tur atana thil pawimawh tak tak Cooperative Development Council din dan tur leh Mizoram sawrkar-in Central sawrkar leh NABARD-te MoU a lo sign pui tawh tihhlawhtlinna tur a ruahmanna-te a awm a ni.

Labour & Employment Minister Pu Lalrinliana Sailo Bill put luh "The Mizoram Shops and Establishments Bill, 2010" pawh sawiho anih hnuin lungrual taka pawm a ni a, he Bill ah hian Mizoram chhunga eizawnga inhlawhfa (labour) te anmahni chhawrtuten dan hnuaiah mumal zawka an chhawr leh enkawl dan tur bakah an hamthatna awm thei ang angte pek an nih theih dan tur te a awm a ni.