Mizoram State Legislative Assembly 7-na session hmasa ber chu vawiin atanga neih tan a ni a. Vawiin session ah hian Palak bial atanga thlan tlin Pu Hiphei chu Mizoram State Legislative Assembly 7-na Speaker atan chuhtu awm lova tlinga puan a ni.

Vawiin Assembly Session hi Protem Speaker Pu R.Lalrinawma’n a kaihruai a. Member thlan thar ten rinawmna thu an tiam zawhin Speaker thlanna neih a ni a. Ruling bench atang chauhva nomination siam a nih avangin Pu Hiphei chu chuhtu awm lova tlinga puan a ni.

Pu Hiphei hi Mizoram UT sorkar hnuaia Legislative Assembly hmasa ber, 1972 ah khan Tuipang bial atanga thlan tlin niin Deputy Speaker atan thlan a ni a. UT Sorkar hnuaiah Tuipang bial atang hian vawi 5 thlan tlin a lo ni tawh a ni. State sorkar hnuaiah kum 1987 khan Tuipang bial atang vek hian thlan tlin niin kum 1989-90 chhung khan Speaker hna hi a lo chelh tawh a. Kum 1990-1996 leh 1996-2002 ah te khan India ram rorelna sang ber Parliament(Rajya Sabha) ah Member a lo ni tawh bawk a ni.

House Leader Pu Lal Thanhawla chuan Speaker thar chu lawmpuina a hlan a.House zahawmna kengkawh tura hna a thawhna kawngah duhsakna hlanin Pu Hiphei chu amah leh a thawhpui te chuan englai pawhin an thlawp tlat dawn tih a sawi a. Opposition Group Leader Pu Vanlalzawma pawhin Pu Hiphei chu lawmpuina leh duhsakna a hlan a. House kaihruai turin opposition member te chuan an ring tawkin amah ah beiseina sang tak an nei tih a sawi a ni.

Assembly session hi naktuk ah chhunzawm a ni ang.