Vawiin khan Aizawl Civil Hospital OPD, Naupang inentirna hmunah Zenghri Venna beihpui, Assembly Speaker Pu Hipheia’n a hawng.

He Zenghri Venna Beihpui inkhawm Dr.Lalzawmi, State EPI Officer in a kaihruaiah hian Assembly Speaker Pu Hipheia chuan, kum 3 zet India ram ah zenghri vei thar an awm tawh loh avanga lawmawm a tih thu sawiin, thawktu te inpekna chu chhuanawm a tih thu leh thawktu te chu mipuite nen a thawhhona tha tak nei chhunzawm zel turin a chah a. Tunhnai ah zenghri natna vei thar hmuhchhuah awm lo mahse, zenghri natna laka kan tu leh fate an lo him zel theihna turin naupianghlim atanga kum 5 chin tawh phawt chu zeng hri danna pek ngei nise a ti.

Thu a sawi zawh hian Speaker chuan Zenghri venna (Polio Vaccine) naupang hnen a pe in he beihpui hi a tan a. Dr.Lalrinliana Sailo, Principal Director, Health & Family Welfare, Dr.K.Ropari, Director of Health Services, Dr.Lalbiakkima, Director, Hospital & Medical Education ten Zenghri venna hi an pe bawk.

Zenghri venna beihpui hi ramchhung hmun dang ah chuan Ni 19 January, 2014(Sunday) khan neih tan a ni tawh a, Pathianni a nih avangin Mizoram ah chuan vawiinah tan niin, ni 21 January, 2014(Thawhlehni) hian Mizoram pum ah beihpui thlak a ni ang a, mahni awmna hnai ber sub-center ah leh IPPI Booth tin ah a thlawna lak theih a ni. Zenghri venna (Polio Vaccine) hi Mizoram pumah naupang 1,29,843 pek tum niin, hemi atan hian a lakna hmun tur pawh 1298 siam a ni.

Attachment

  • Loading attachment...