Ni hnih awh tur “Orientation Workshop on National e-Vidhan Application” chu vawiin chawhma khan Assembly Speaker Pu Lalrinliana Sailo chuan Mizoram Legislative Assembly Conference Hall-ah khawnvar chhiin a hawng.

Pu Lalrinliana Sailo chuan khawvel thiamna sang zel mila ram rorelna kalpui a ni tur chu lawmawm a tih thu a sawi a. Paperless Assembly, e-Assembly ti a sawi ni bawk chu a taka kalpui anih hunah chuan hnathawh a awlsam phah bakah sum senna tam tak  tihbo anih bawk dawn avangin Sawrkar inrenchem kawngah nasa takin a tangkai tel dawn a ni a ti.

Workshop khuhhawnna thusawitu Pu S.R Zokhuma. Mizoram Legislative Assembly Secretariat Commissioner & Secretary chuan Information Technology thiamnain mitin a hrut tawh thu leh Legislature -a a tangkai thei ang bera hman a pawimawh thu a sawi a, Central Programme Monitoring Unit atanga mithiam lo kal Pu Arpit Tyagi-a'n NeVA nihphung leh awmziate a sawifiah a. Pu H. Lalrinawma, Additional Secretary-in lawmthu sawina in Workshop hawn inkhawm hi a khar a ni.

NeVA hi Ministry of Parliamentary Affairs hmalaknaa ram chhung rorelna in hrang hrang (House of Parliament, State Legislatures) a hnathawhnaah lehkha aia information technology hmanga kalpui tura ruahmanna a ni a; hemi hmang hian House-a rorelna leh tul dangte awlsam taka mipui vantlang hmuh leh chhiar theih tura chhawpchhuah a ni tawh ang. NeVA hi mipuite leh an aiawha roreltute hnuk hnai a, democracy rorelnaa mawhphurhna awmze nei, langtlang leh rintlak neihna tura hmalakna a ni.

He ni hnih awh tur Workshop-ah hian Central Programme Monitoring Unit atanga Resource Person pahnih Pu Arpit Tyagi leh Pu Rahul Agarwal te bakah Mizoram NIC-a mithiamte'n NeVA chungchang zirtirna kimchang an pe ang.

Attachment

  • Loading attachment...