261/2022-2023 

Aizawl, the 25^th April 2022 : Nimin khan Assembly Speaker Pu Lalrinliana Sailo chuan Bangladesh Commerce Minister Pu Tipu Munshi leh a hote chu a Bangla ah zanriah a buatsaihsak a. Inkawmna tawite an nei a, Speaker chuan British in Mizoram an awp hmaa Mizote sumdawnna kalkawng ber chu Bangladesh a nih dan te Bangladesh Minister hrilhin tun kum 20 kaltaa Bangladesh in hma sawnna a neih chu ropui a tih thu a sawi a. Bangladesh Minister lo zin hian insumdawntawn naah Mizoram tan bung thar kaina a nih a beisei tiin Bangladesh a Zohnathlak awm mek te chanchin pawh Speaker hian Minister chu hrilhin anni hi tlemte an nih avangin hre reng turin a ngen.

Pu Tipu Munshi chuan Bangladesh chuan Hmarchhak state tin te inlaichinna tha leh insumdawntawna kawng hawn chu an ram hruaitu lu ber Prime Minister Sheikh Hasina leh Bangladesh Sawrkar ngaihpawimawh a nih thu te sawiin hemi kawngah hian hma an lak mek dan chanchin a sawi. Mizoram in an lo mikhual that dan chu a rilru a khawih hle thu sawiin Mizoram Sawrkar chunga lawmthu a sawi.

Speaker zanriah ah hian Commerce & Industries Minister Dr. R. Lalthangliana; Assembly Deputy Speaker Er. Lalrinawma; Chief Secretary Dr. Renu Sharma; Assembly Commissioner & Secretary Pu H. Lalrinawma leh Assembly officer dangte an tel a ni.