Mizoram      Legislative    Assembly Speaker Pu R. Romawia chuan a bial chhung khaw hrang hrang te tlawhin an mamawh leh ruahmanna te a thlirpui. Speaker hian a ruahman angin a bial chhunga khua Selesih, Durtlang North, Durtlang, Leitan, Bawngkawn, Bawngkawn South, Chaltlang Lily veng leh Chaltlang khua te hi March 5,2010 ah Selesih khua atangin a fang tan a. Assembly Budget Session hun te a hnaih tawh avangin Speaker hian chhun lam Office tibuai lovin zingkarah bial fan programme hi a nei a ni.
Speaker bial fang hi khaw tinah khawtlang hruaitu V/C leh NGO hrang hrang ten lo lawmin an mahni khua theuh a vantlang mamawh leh ruahmanna te lo hriattirin, Sorkar Department hrang hrangah an mamawh te chu hmalakpui turin an lo ngen nghal a ni.

Speaker chuan amah lo dawngsawngtu khawtlang hruaitute chu chibai bukin Sorkar hmalakna hrang hrang te a hrilhfiah rualin, a bialchhung hmasawnna atana Sorkar hmachhawp leh ruahmanna te a hriattir a, NLUP chungchang te pawh Sorkar fimkhurna te hrilhfiahin hun rei lo te-a semchhuah theih mai a beisei thute a hriattir nghal bawk. Speaker Pu Romawia chuan heng a bial chhung khaw hrang hrang-a ML A Fund hmanga an hnathawhte a thlirpui nghal a, hmalak chhunzawm zelna tur te pawh a hmun ngeiah kalin a thlirpui a, heng khawtlang hmasawnna atana hmalak chhunzawm pawimawh tak tak te hi khawtlang hruaitute chuan lungrual taka hma an lak chuan chak taka hma la tura Sorkar hotute hnenah lo nawr chhunzawm zel a inhuam thu te hriattirin khawtlang hruaitute hi a thlamuan a ni.