Vawiin chawhma dar 10:30 khan Mizoram Legislative Assembly Speaker Pu R. Romawia chuan Govt. Johnson College Graduation Day khuallian niin a hmanpui. He Graduation Day function hi Pu Vanlalsawma, Associate Proffessor-in a kaihruai a, Students Union lam leh College Principal Dr. K. Vanlalmawia te hnen atangin report ngaihthlak a nih hnuin Graduate thar te inhmelhriattirna neih a ni.

Govt. Johnson College Graduation Day function a lo kal zirlai leh Zirtirtute chibai bukin Pu R. Romawia chuan College a kal lai a Students Union hruaitu chanvo pawimawh tak chelh a a lo tawn hriatte tarlangin zirlaite chu rilru puitling tak pu-a tan la zel turin a fuih a. Speaker chuan kan mizia leh rilru puthmang kan sawhngheh loh chuan chimral mai theih kan nihna te sawiin kan pi leh pute atanga ze tha Tlawmngaihna, taimakna, huaisenna, rinawmna leh tumruhna te kan chhawm nun zel chuan chimral kan ni mai lovang a ti. Zirlaite a fuihnaah Speaker chuan Media lamin Mizo te chanchin a tarlan dan fimkhur a tulzia a sawinaah Mizo nula leh tlangval fel leh tha leh chhuanawm tam tak an awm laia awm tha duhlo leh nun uluk lo tlemte mualpho taka tarlan a ni thin chu pawi a tih thu sawiin a tha lam tam zawk phochhuaka chona tam zawk chhuah ni thin se kan tangkaipui zawk ngei a beisei thu a sawi.

Speaker chuan lehkhabu hrang hrang a chhiar atanga a lo chhinchhiah te zingah Thiamna nei tha leh zu leh ruih theih thila insum te an damrei tlangpui a ni tih zirlaite a hrilh a. Zir thiamna an neih rualin leh ram leh hnam tana mi hmantlak ni ngei tura fuihin zirlaite duhsakna a hlan a ni.