Vawiin khan Chief Minister Pu Lal Thanhawla leh Mizoram Assembly Subject Committee-I leh Central YMA hruaitute chu Chief Minister Office-ah an inkawm a. Tunlai a Mizoram chhung, a bikin Aizawl khawpui a ruihlo rawn tam thar leh avanga harsatna awm mek te bakah hmalak dan tur an sawi ho a ni.

Chief Minister Pu Lal Thanhawla ho a meeting-ah hian Subject Committee-I leh CYMA  hotute chuan hmalak tur zingah hmanhmawh deuh a bawhzui ngai an tih te an thlen a. Aizawl chhehvel a ruihlo zuar tamna hmun a dan leh thupek kengkawhtuten rang zawka hna an thawh theih nan hmun remchang lai zawn ni se; chutah chuan Beat Post siam ni se tih rawt a ni a. Tunhnai a zirchianna in ruihlo ngai inchiu thin te zingah HIV/Aids vei an pung thar tih a tarlan chu rampawn tanpuina kaltlanga  inchiuna hmanrua a thlawna lak theih thin chu tih tawp a nih tak  avang te leh No.4 man tlawm zawka lei tur a awm avangah ngaih a ni a. Inchiuna hmanrua te a thlawn lak tur ruahman dan tur te rawt a ni a. CYMA hruaitute  leh Subject Committee - I te chuan Chief Minister Pu Lal Thanhawla chu Ministry of External Affairs hnenah Myanmar an tlawh theihna tur remchanna kawng zawnpui turin an ngen a. CYMA hruaitute  leh Subject Committee - I te chuan Myanmar an tlawh theih chuan Myanmar a Mizo  tlawmngai pawl te thawhpui a Ruihlo Myanmar atanga rawn tawlh luh tihtawp dan kawng an hmuhchhuah an inbeisei thu an sawi a ni.

Chief Minister ho a inkawmna ah Subject Committee-I lam atang Chairman Pu PC Zoram Sangliana, MLA leh member te -  Lt Col ZS Zuala (Retd), MLA, Pu John Siamkunga, MLA, Pu T.Sangkunga, MLA, Pu Nihar Kanti, MLA  leh Pu Lalruatkima, MLA te an tel a. CYMA aiawhin President Pu Vanlalruata, Vice President Pu R.Lalngheta, Treasurer Pu Lalrochuanga Pachuau, Pu Peter Chhakchhuak, Assistant Secretary leh Finance Secretary Pu Fabian Lalfakawma te an tel thung a ni.