Vawiin khan National Mental Health Programme , Mizoram buatsaihin CMO Office Kumtluang Hall leh OPD Center District Hospital Mamit-ah Mental Health chungchang inzirtirna leh Free Clinic Campaign neih a ni a. Dr. Zothankhuma Chief Medical Officer, Mamit District chuan khuallian niin he hun hi a hmanpui.

He hunah hian khuallian Dr. Zothankhuma chuan thu sawiin khawvel pumah kumtin mi Nuai 8 vel mahni intihlum anga chhut a ni a, an intihhlum chhan ber chu rilru lam harsatna leh ruihhlo vang a ni a ti. Tun dinhmunah khawvela naupang leh tleirawl 20℅ vel hi rilru lam harsatna/natna  nei anga chhut an ni a, rilru lama harsatna nei enkawlna kawngah hian khawtlang mipuite nena kan thawhho that a pawimawh hle a, hetiang lam natna neite hi mipuite'n enhrang lovin mi pangngai angin en ila, hmangaihna leh dawhthei taka enkawl chuan khawtlang tan pawh mi tangkai tak an ni theih thu sawiin hetiang natna nei enkawl kawngah hian khawtlang mipuite kan pawimawhin mawhphurhna lian tak kan nei a ni a ti bawk.

Dr.Robert L.Khawlhring, State Nodal Officer, NMHP pawhin thu sawiin Mizoram chhunga District pariatah District Mental Health Programme a awm tawh thu sawiin rilru lam natna te hi natna dangte anga enkawl leh tihdam theih a nih thu a sawi bawk.

Awareness Campaign-ah hian Dr. Robert L. Khawlhring, SNO, NMPH, Lalhmingmawii, Clinical Psychologist, Angela Zohmingthangi, Psychiatric Social Worker, Zothansangi, Counselor te'n thupui thlan chhuah hrang hrang hmangin kalkhawmte zirtirna an pe a. Rilru lama harsatna nei te tan a thlawna inentirna buatsaih niin inentir te hnenah hian a thlawnin damdawi sem a ni bawk.

He hun hi Dr. Lalsiama Tualzik, Pediatrician-in kaihruaiin Mamit khawpui chhunga MHIP Branch hrang hrang hruaitute bakah khawpui chhung Branch hrang hranga YMA hruaitute an tel a ni.