Vawiin chawhma dar 10:30am khan District Industries Centre, Conference Hall, Saiha-ah "District Level Seminar on PMEGP" neih niin, Pu Kunal IAS, Deputy Commissioner, Saiha District, Saiha chu khuallian ani.

He Seminar hawnna hunah hian Pu Kunal IAS chuan thusawiin, sorkar laipui atanga tanpuina leh loan chi hrang hrang lokal thin te, a hmanna tur dik taka hmanga hlawhtlin pui ngei tum turin kalkhawm te a chah a, loan hmu te chuan loan rulh lam pawh an ngaithah a thianglo ani a ti. Loan rulh that loh hian bank lam tan chauh nilovin a hnunglama loan hmu ve tur tam tak tan kawng an khar sak thin a ni, a ti bawk.

Vawiin vek chawhma dar 11:30am khan Pu Kunal IAS, Saiha District Bawrhsap kaihruaina hnuaiah "Faina Hapta" Cleanlinees Week, 0ct 2-8, 2010 chhunga hman dan tur ngaihtuahin DCs Conference Hall, Saiha-ah meeting neih a ni bawk.

He meeting-ah hian Tlawmngaipawl hrang hrang aiawh te, Department hrang hrang hotute leh chanchin thar thehdarhtute an tel kim hle. MADC a tang pawhin Pu TA Chhohu, Executive Secretary leh A.Beimosa, L.A.O. te he meeting ah hian an tel ve ani. Meeting chuan Saiha khawpui vawnfai dan turte chipchiar takin an sawi hova. Cleanliness Week denchhen hian faina lama ziaka thawh hlawk ber Chanchinbu thlan turte, Class-XII hnuailam zirlai tan thupuia "Saiha khua hi a fai tawk a ni" tih leh 'Fai tawk lo' tih Debate buatsaihte Khua, Veng, Hotel/Restaurant, Office leh School leh mimal in faiber thlan tur chung chang te an rela, Faina Hapta hawnna inkhawm hi Saiha Bazaar Traffic Point bulah neih tur a ni a, a kharna inkhawm hi Laila Hall-ah neih ani ang.