311/2022-2023
Champhai, the 27th April, 2022: India ramin zalenna a hmuh kum 75-na lawmna 'Azadi Ka Amrit Mahotsav' hnuaiah vawiin khan DCSO Office Champhai buatsaihin I&PR Conference Hall, CHANEM-ah Sawrkar laipui Department of Food & Public Distribution, Ministry of Consumer Affairs, Food & Public Distribution kaltlanga a thlawna miretheite hnena buhfai semna scheme, 'Pradhan Mantri Garib Kalyan Anna Yojana (PMGKAY)/Prime Minister Food Security Scheme for the Poor' chungchang inhrilhhriatna hun buatsaih a ni a. He hun hi District Bawrhsap Pu James Lalrinchhana chuan khuallian niin a telpui a ni.

Khuallian Pu James Lalrinchhana chuan Supply Department bultuma sawrkar scheme pawimawh tak Pradhan Mantri Garib Kalyan Anna Yojana chungchang inhrilhhriatna buatsaiha a ni chu lawmawm tiin, hamthatna dawngtute a lawmpui thu a sawi a. India ram zalenna kum 75 na lawmna Azadi Ka Amrit Mahotsav kaltlangin hmun hrang hrangah program hrang hrang neih niin Champhai District-ah pawh a lawmna program kalpui chhoh mek zel a nih thu sawiin, District mipuite chu hmalaknate tha taka thlawpa neitu thinlung pu a tel vek tum turin a chah a. Khawvel buai mek karah India ram zalen leh mipui sawrkar ngelnghet tak, tualzal nun zalen tak neih hlutzia hre thar leh tura sawmin, a vawngnungtu nih tum turin a chah a ni.

PMGKAY scheme hamthatna dawng thei rama kan awm hi kan vannei takzeta, hengte hi sawrkar chak leh ngelnghet, ram zalen tak leh inrelbawlna felfai leh chak tak hnuaiah chauh a awm thei a ni, a ti a. Mipuite chu zalenna ngaihlu lehzual tura chahin, zalenna kum 75 na lawmna pualin sawrkar scheme pawimawh tak takte inhrilhhriatna neih chhoh zel tum a ni, a ti a. District mipuite chu ram leh hnam hmangaih thar tur te, rinawmna, taimakna leh thahnemngaihna nen thil zirchiang chunga hmasawnna lam pan tum theuh turin a chah bawk.

PMGKAY chu Atmanirbhar Bharat hnuaia scheme pawimawh tak a nih thu leh scheme kaltlangin hrileng avanga harsatna tawkte leh harsa zualte buhfai pek a ni, a ti a. District hmasawn nan thawhhona tha tak awm a tul thu sawiin, Sawrkar Department hotute chu thawhhona leh inpawhtlannna vawng tlat tur leh mipuite chu sawrkar hmalaknate thlawp turin a sawm a. District-ah hrilengin ziaawm lam pan zel rih mahse himna leh taksa hriselna atana zawm tulte zawm hram hram turin mipuite a chah a. A tha zawngin hmasawnna rahbi zawh kawnga tanlakpuiah sawmin, an finchhuahna leh thurawnte DC Office-in a dawn reng theih thu a sawi bawk.

He hun hi Pu CC. Sakhawliana, DCSO Champhai chuan kaihruaiin powerpoint presentation hmangin scheme a sawifiah bakah Consumer Rights leh District Consumer Redressal Commission chungchang a sawifiah a. Tunhnaia ngaihven hlawh tak Fortified Rice chungchang pawh tarlangin, a hlauhawm lo a, taksa hrisel nana mineral leh vitamin-te pawlha siam a ni, a ti bawk.

He hunah hian PMGKAY hnuaia hamthatna dawngtu AAY/PHH chhungkaw aiawh leh kalkhawm dangte hnen atangin department leh scheme kaltlanga hmalaknate fakawm an tih thu ngaihthlak a ni a. Pu Lallianzuala, JAO chuan lawmthu sawiin hun a khar a ni.

He scheme-in a tum ber chu miretheiten eitur an neih nan leh, tam lai leh hripui len lai pawha chaw ngheia tumah an thih loh nana duan a ni a. Pradhan Mantri Garib Kalyan Anna Yojana hi Mizoramah chuan Food, Civil Supplies & Consumer Affairs Department hnuaiah kalpui a ni a. Buhfai hi Food Corporation of India hnen atangin Mizoram Sawrkarin Food, Civil Supplies & Consumer Affairs Department hmangin Retailer kaltlangin a dawngtu turte hnenah sem thin a ni. PMGKAY dawng thei tlangpuite chu BPL Family Antyodaya Anna Yojana (AAY) leh Priority Household (PHH) te, State Sawrkarin dawng thei tura bithliah huam chin te, hmeithai, hriselna lama harsatna neite, pianphunga rualbanlo emaw, kawng dang atanga tanpuina dawnglo te, nitin a inhlawhfa regular-a sum lakluhna nei lo te leh BPL family HIV positive-te chu a tlangpuia dawng theite an ni.

PMGKAY hi Prime Minister Relieve Programe niin Mizoramah pawh May 2020 atangin hman tan a ni a. Covid-19 hrileng avanga ei leh bara harsatna chhawmdawl nan NFSA Beneficiary (AAY & PHH) te hnenah a thlawnin mi pakhat zelah buhfai Kg 5 sem chhuah thin a ni. DCSO Champhai tarlan danin he mi scheme kaltlang hian Central Sawrkarin thla tin Mizoram Sawrkar tan buhfai sem tur quintal 33410.75 a pe thin a. Tun dinhmunah PMGKAY hi phase 6 kalpui a ni a, a phase 6 na hi April 2022 atanga September 2022 thleng awh tur a ni a. Kumin April thla chhung hian hemi scheme hnuaiah hian buhfai quintal 34746.35 a thlawnin sem chhuah a ni a, Central sawrkar pekin a daihlohna zawng quintal 1335.60 hi Mizoram Sawrkarin a tum bawk a ni. Undivided Champhai District-ah pawh he mi scheme kaltlang hian tun thlengin buhfai quintal 22452.80 lai a thlawnin sem chhuah tawh a ni.

He hunah hian PMGKAY hamthatna dawngtute, Champhai khawpui chhung VC, Retailer, District Consumer Association member leh Chanchinbumite an tel a ni.