3740/2022-2023

G20 hnuaia meeting peng pakhat B20 Meeting, Aizawla nghah chu vawiin chawhma khan Mizoram University Auditorium-ah a hawnna inkhawm neih a ni a. He hunah hian Chief Minister Pu Zoramthanga, Minister of State for Commerce & Industries Pu Som Parkash leh Minister of State, External Affairs Dr. R. K. Ranjan Singh te'n an telpui a ni.

B20 meeting hawnna inkhawm hi Confederation of Indian Industry (CII) Co-Chairman Pu Pradeep Bagla chuan kaihruaiin kalkhawmte lawmna thu a sawi a. Chief Minister chuan India rama G20 meeting hrang hrang nei tur zingah Mizoram leh hmarchhak state dangte a nghah a ni tel chu lawmawm tiin Prime Minister Pu Narendra Modi chungah pawh lawmthu a sawi a. Mizoram hi investment tihna hmun tha tak a nihna he meeting hian a phochhuah ngei a beisei thu a sawi. Chief Minister chuan horticulture, agriculture leh ramngaw behchhanin state economy hi thui tak a tihhmasawn theih dan te sawiin, he conference in a bitum bik - Urban Planning, Infrastructure, Bamboo, Startups, Skill Development leh Nursing and Paramedics te chu Mizoramin theihna/potential a neih thatna lai a nih thu a sawi a. Mizoram chu ram dang nen a inri a nih avanga insumdawn tawnna leh ram dangte nen inlaichinna kawnga pawimawhna a neih thu a sawi a, Mau, thei leh thlai thar te tam tak thar tura hmun remchang a neih mai bakah a hlutna belhchhan tura processing unit siam hlawkna te, chumi atan investment a remchan dan te, inkalpawhna atan railways leh airways a hma lak zel a nih bakah Kaladan Multi modal Proejct kal zeleh lawng hmanga insum dawn tawnna tur remchang a awm chhoh zel tur te sawiin heng zawng zawng hian Mizoram chu insumdawn tawnna hmunpui ah a siam theih thu a sawi a. He B20 meeting hian state leh ram tan hlawkna a thlen ngei a beisei thu Chief Minsiter chuan a sawi bawk.

External Affairs Minister Dr. R. K. Ranjan Singh chuan a thusawiah Mizoram chu literacy rate sang tak a nih mai bakah English tawng hmang thei thahnem tak an awm avangin leh, thalai lehkhathiam an tam avangin hengte hi tangkaina tam tak business khawvelah a siam theih thu a sawi a. India economy chu tun hun reilo te ah khawvel huapin nasa taka a han thu leh a bik takin multilateral business partnership siam chungchangah hmalak a nih dan te a sawi a, India hamrchhak state te chu Asia chhim chhak ramte nen inlaichinna leh insumdawn tawnna atan pawimawh tak a ni thu te a sawi bawk.

Commerce & Industries Pu Som Parkash pawhin India chu khawvela start up eco-system lian ber zing ami a nih thu leh, hmarchhak state dangte ang bawkin Mizoram chu investment tihna hmun tha tak a nih thu a sawi a. Industry hrang hrangah hmarchhak state-te chu hmasawnna ruhrel hrang hrang din a tihchangtlun hna sawrkar laipui chuan a thawh thu te, a bik takin National Bamboo Mission kaltlanga mau hmanga economy tihhmasawn hna thawh a nih dan te a sawi a. Healthcare lamah, a bik takin nursing and paramedics hmasawnna atan Mizoramin potential a neih thu te sawiin, hnam ziarang a bet nghet tlat handloom and handicraft ah te, service sector ah leh thil dang dangah Mizoram chu hmasawn theihna tam tak Mizoram a nei nia a hmuh thu sawiin, vawiina hun hman tur hian India leh ram dan inlaichinna te a tihngheh a rah tha a chhuah ngei a beisei thu a sawi.

Pi Rupa Dutta, Principal Economic Adviser, Department for Promotion of Industry and Internal Trade, Government of India leh Dr. Renu Sharma, Chief Secretary ten he hunah thu an sawi bawk a. Home Department Commissioner & Secretary Pu H. Lalengmawia chuan lawmthu sawiin hun a khar ni.

B20 meeting hawnna inkhawm neih hnu hian Chief Minister leh Minister of State pahnih te hian press conference an nei a. Chawhnu lamah plenary session a chhunzawm a ni a. Urban planning, Infrastructure, Bamboo, Startups, Skill Development, Handloom & Handicraft, Nursing & Paramedics atan Multilateral Business Partnership siam theihna tur remchang bitum in, Business to Business (B2B) leh Business to Government (B2G) meeting te CII bultuma buatsaih a ni a. B2B meeting-ah hian State pawn atanga lo kal Business Delegates te chuan local industry neitute nen inawkmna hun an neih bakah B2G session ah hian sawrkar department thenkhat, a bik takin Health, Urban Development, Commerce and Industries, Tourism, Sports & Labour Employment, Skill Development and Entrepreneurship te nen thawho theihna chungchang sawiho a ni bawk.

He meeting ah hian delegate te hmuh turin stall siam a Mizorama industry te thilsiam phochhuah a ni a. B20 meeting ah hian ram 17 (Argentina, Bangladesh, Bhutan, Canada, Costa Rica, Cote D’Ivoire (Ivory Coast), China, France, Germany, Ghana, Japan, Nepal, Russia, Sri Lanka, South Africa, United States leh Zimbabwe) atangin an lo kal bakah Indian leh local business neitu an tel bawk a. Visiting dignitary te hi overseas business delegate 48 leh diplomat 17 an ni a. Bhutan, Bangladesh leh Japan atanga lo kal an awm bawk a ni.

Zan lamah MZU ah vek zanriah buatsaih sak an ni a. Naktuk ah Aizawla Chapchar Kut lawmnaah delegate te hi tel turin Mizoram sawrkar chuan a sawm hlawm a ni.

Attachment

  • Loading attachment...