No.238/2021-2022

Aizawl, the 23rd April 2021: Vawiin khan Chief Secretary Lalnunmawia Chuaungo chuan Bairabi leh Sairang inkara Rel kawng KM 51.38 a thui, Northeast Frontier Railways(NFR) in a siam mek a tlawh a. Project site hrang hrang te fangkualin Lei dawh(Bridge) leh Rel Station buatsaih mek a hna thawh kallai te chu a endik a ni. NFR hotuten an harsatna chinfel sak tura state sawrkar hnena an lo thlen tawh chinfel dan tur te pawh NFR hotute nen a hmunah an sawiho a. Tunah hian hna thawh tur zawng zawng atanga chhuta a chanve aia tam thawh zawh tawh a ni a; December 2023-ah he rel kawng leh station te hi hman theih tura peih fel hman beisei a nih thu NFR hotute chuan an sawi a ni.

Chief Secretary Pu Lalnunmawia Chuaungo leh a zuitu official te Bridge No.115, Khamrangah Pu Vinod Kumar, CE, Bairabi – Sairang Railway Project, NFR leh a thawhpui ten an lo dawngsawng a. Helai hmunah hian Pu Vinod Kumar chuan Bairabi – Sairang Railway Project hmalakna kal mekah an thlen chin leh a hmalakna tlangpui te sawifiahna hun a hmang a ni. Hemi hnu hian Chief Secretary leh NFR Engineer te chuan Mualkhang Rel Station siam mek te, Bridge No.161, 167 leh 196 te tlawh leh in uluk takin Sairang Rel Station buatsaih mek te an endik chhunzawm a ni. He Rel kawnga Lei dawh thenkhat te hi a sang hle a; Pier 4(Lei dotu ban) Brigdge 196 a mi phei hi chu a sang fal hle a, a ban bulthut Kurung lui atanga tehin 115 Metre laia sang a ni a. Helai a Pier phun hi he project ah chuan a hautak ber pakhat niin tunah hian a foundation khawih mek a ni. Mualkhang leh Sairang Station-ah te hian Rel Station 4 a tui pek dan tur ruahmanna te sawifiah a ni a. Electric hruipui hnawk deuh te chin fela ban phun sawn a nih theihna tur pawh a hmunah te enho niin ruahmanna siam a nih dan te ennawn a ni.

Chief Secretary Pu Lalnunmawia Chuaungo chuan Mizoram chhungril zawka Rel kawng rawn lut tur chu nghahhlelhawm a tih thu a sawi a. Hei hian Mizoram State Economy tan nasa takin hmasawnna a thlen dawn a ni a ti. Bungraw chi hrang hrang - ei leh in, insakna bungrua leh nitin mamawh thil te pawh tun aia tlawm zawk leh rang zawk daihin a lut thei dawn tih a sawi a. Mizorama kuthnathawk tute tan pawh Rel rawn lut hian tangkaina nasa tak a neih tur thu a sawi a. Kuthnathawktute tharchhuah Phai lama thawnchhuah pawh nasa takin a awlsam zawk dawn a ni a ti.

Bungraw chi hrang hrang tlawm zawka kan hmuh theih dawn bakah khualzin veivakte tan awlsamna nasa tak a siam dawn a. Aizawl atanga Guwahati hah taka motor hmanga kal ai chuan Rel hmanga hahdam taka zin mi tam zawkin an duh dawn a; zin chhung pawh a rei lo zawk dawn a ni a ti. Heng bakah hian khawtual miten an chhawr tangkai tur thil tam tak Rel kawng rawn lut hian ken tel a nei dawn bawk a ni a ti a. Chief Secretary chuan Rel kawng siam hna thawktute chu an hna uluk taka chhunzawm tur leh contractor te hnathawh pawh veng uluk zel turin a chah a. State sawrkara an mamawh an thlen leh state sawrkarin a chinfel ngai apiang te pawh a theih anga rangin sawrkarin chinfel a tum a ni a ti.

Bairabi leh Sairang inkarah hian Rel Station 4 – Hortoki, Kawnpui, Mualkhang leh Sairang a awm dawn a ni. NFR hotute report pek dan chuan he Rel Kawng siam hna hi kum 2008 May thla khan National Project zinga pakhat atan puan a ni a. Tunah hian hna lian tham leh hautak zual 74% lai thawh zawh tawh a ni a; Rel Station 4 te siam hna bik pawh hi 55% thawh zawh tawh niin he project pum puia hnathawh tur zinga 57.80% thawh zawh tawh a ni. He Rel kawng KM 51.38 a thuiah hian Lei dawh liantham ( Major Bridge) 55, Lei dawh tenau deuh(Minor Bridge) 87 leh leiverh(tunnel) Metre 12,672.25 a thui/sei a awm a. He Rel kawng siam hna hi March 2023 a thawh zawh tura chhut ni mahse hun rei tak chhung Compensation ngiattu ten harsatna an siam avang te, Hrileng avanga Lockdown te leh hnathawktu tur chhawr tur phurhluh chungchangah te harsatna te a awm a vangin a hun pangaiah zawh hman a nih hmel loh a. Thla 10 chuang zet hnathawh a khaihlak avangin kum 2023 December thla ral hmaa zawh hman beisei a ni ta zawk a ni.

Tun dinhmunah Bairabi – Sairang Railway Project siamna atana senso ngai zawng zawng chu Rs 5521.45 Crore a ni a. Heta tanga pawisa hman tawh zat chu Rs 3872.91 Crore a ni.

He Relkawng, Darkar khata Km 100 thlenga chaka tlan theih na tur siam hna hi NFR chuan a duh uluk hle a Contractor hnathawk tha lo 18 lai a lo chawlhtir tawh a. Tunah hian Rel Station panna kawngpui siam dan tur endik tawh ni mahse hna thawh a la ni lo a. Railway ramin a huam tur chinah pawh chinfel ngai te a la awm avangin ramri felfai tak Railway hian a la nei thei lo a ni. Rel Station 4 atan hian PHED chu DPR(Detailed Project Report) buatsaih turin NFR chuan a ngen tawh a. Tunah hian Sairang Rel Station atan Tui lak luh dan tur ruahmanna DPR chu peih fel a la ni lo deuh a. Relkawng hnaiah Electric ban lian chi ding thenkhat te pawh sawn ngai a la awm mek bawk a. Heng State Sawrkar atanga chinfel ngai te hi chinfel thuai a nih theih nan NFR hotute chuan Chief Secretary hnenah hian ngenna an lo thlen a ni.

Sairang Rel Station hi Terminal Station - Coaches maintenance na hmun te pawh awmna tur a ni dawn a; station dang 3 aia lian deuh zawk tura buatsaih mek a ni a. He station-ah hian Passenger ten Rel an lo channa tur ringawt Platform 3 awm tura ruahman a ni a. Line 7 : Passenger line 3, Bungraw phur (Goods Line) line 3 leh maintentance & Service line 1 lai a awm dawn a. Bungraw phur bik tan pawh Goods Platform siam a ni dawn a ni. Chhutlawkna awm mek ang chuan Sairang Rel Station atang hian a tlem berah Rel 10 tal lutchhuak tura beisei a ni a. Aizawl to Delhi atan Rajdhani Express, Aizawl to Guwahati tan Rel chak chi, zirlai leh damlo te pan tamna lama kal tur rel te leh a dang te a lut chhuak tura ngaih a ni. Station dang te pawh hi lian pangai taka duan vek leh a tul anga zauh theih tura ruahman vek a ni.

Bairabi – Sairang Railway Project a endiknaah Chief Secretary chu Pu C.Lalramliana, SE, Aizawl Power Circle, P&E, Pu Lalrammawia, SE, Rural WATSAN Circle, PHE, Pu C.Zothantluanga, EE, RWD(A), PHE, Pu Malsawmsanga, Deputy Director, I&PR leh Pu Hrangtawna, IRTS(Rtd.), Consultant, Bairabi – Sairang Railway Project ten an zui a. NFR lam hi Pu Vinod Kumar, CE, Pu Sahemlung Kamei, Dy CE, Bairabi - Sairang Railway leh Pu SC Rai, Dy CE, NF Railway (Electricity), Silchar ten an ho thung a ni.