1354/2022-2023

Dated Serchhip, the 26th July, 2022: Vawiin khan DC Meeting Hall ah Serchhip District Election Officer Pi Nazuk Kumar, IAS chuan Baktawng Village Council Reserved Seat Bye Election lo awm tur atana Draft Electoral Roll tlangzarhna a nei.

Pi Nazuk Kumar chuan, Mizo hmeichhiate kawng tinrengah fak tlakin hna an thawk a, sawrkar pisaah te, sumdawnna ah te, kuthnathawhna hmun tinrengah hmuh theihin an awm a, ram rorelna peng tinah pawh hmun dang ang thova tha an thawh tam ve pawh a tul hle a ni. Chuvang chuan kan hmaa Baktawng VC Bye Election ah pawh Party tinten candidate tha tak neih vek lo tum ula, kan hmeichhiate i chherhriam sauh sauh ang u, tiin a chah a. Bye Election hun tur hi State Election Commission lamin an la ruahman fel chiah lo nain reiloteah kan hriat thuai a beisei awm thu a sawi a ni. District Election Officer hian Draft Roll tlangzarh tak hi Party hrang hrang aiawh lokalte hnenah a hlan a ni.

Pi Lalngaihawmi Ralte, Election Officer chuan Draft Roll chungchang sawifiahin, kumin January ni 1 a Election Commission of India in Electoral Roll Final Publication a neih chu Draft Roll atan an hman thu sawiin, siam that tulte siam thatna hun hi tun thla ni 31, July thleng hawn a ni a, 8.8.2022 ah Final Publication neih tum a ni, a ti a. Election Commission of India Software hman leh State Election Commission Software hman a inan loh deuh avangin Voter thenkhatte Address a inang diak diak lo deuh dawn a, nimahsela kha khan an vote thlak theihna chanvo a tibuai chuang lo tin lo hriat sak turin mipuite a chah bawk a ni.

Baktawng Village Council huam chhungah hian vawiina Draft Roll a a lan danin Baktawngah chhungkaw 232 leh Buhkangkawnah chhungkaw 33 te a huam a, Baktawngah hian voters 1035 awmin an zinga 508 hi mipa niin a dang 527 hi hmeichhia an ni a, Buhkawngkawnah hian voters 102 awmin an zinga 47 hi mipa an ni a, a dang 55 te hi hmeichhia an ni. Voters awm zawng zawng hi 1137 a ni. Roll siam that hun hawn mekah hian kumtling china rinluhna hunruat (qualifying date) chu January ni 1, 2022 a ni ang.

Baktawnga hmeichhe Reserved Seat luah mektuin eizawnna avanga a seat luah lai a kalsan avangin Bye Election hi neih turin State Election Commission chuan ruahmanna a kalpui mek a ni.