2133/2025-2026

Aizawl dated 15th September 2025: Vawiin khan Committee Room, Planning & Programme Implementation Department-ah Mizoram State Policy Coordination Committee (MSPCC) chuan Mizoram Sawrkar Flagship Program ‘Bana Kaih Scheme Phase II’ kalpui dan tur relin thutkhawmna an nei a. Pu KC Lalmalsawmzauva, Adviser to Chief Minister chuan hun kaihruaiin Pu Lalmalsawma Pachuau, Secretary, Planning & Programme Implementation Department chuan Phase II kalpuina atana inkaihhruaina tih danglam thenkhatte sawi fiahna hun a hmang a ni.

Thutkhawmah hian Bana Kaih Scheme Phase II chu September ni 19, 2025 atanga kalpui tan tura ruahman a nih thu tarlan niin, hemi tur hian dilna thehluhna tur Online Portal hman dan turte enchhin a ni a. Chief Ministers’ Special Package dilna pawh Online a kalpui tum a nih tawh avangin, dilna thehlut thiam lo te tan Block Development Office, Sub-Divisional Office, Deputy Commissioner Office leh Common Service Centre-te hman tangkai tur a nih thu sawi a ni. Bana Kaih Scheme Phase II ah hian Implementing Department 18 an awm a, Mizoram Khadi & Village Industries Board, ICT leh Mizoram Startup Mission-te telh thar an ni. Bana Kaih Phase I & II a loan emaw Chief Ministers’ Special Package dawng tawh te leh dawng turte hmalakna vil tur ‘Monitoring Team’ te leh Progress Partner ni tura dilna theh lutte zirchiang tur ‘Search Team’-te mawhphurhna sawiho a ni a. I&PR Department buatsaiha ‘Bana Kaih Scheme Phase II’ sawihfiahna video en ho a ni bawk.